भांगरभूंय | प्रतिनिधी
नवी दिल्ली, खबरां संस्था : केंद्रीय सरकाराच्या इलॅक्ट्रॉनिक्स आनी म्हायती तंत्रज्ञान मंत्रालयान मंगळारा सोशल मिडिया खातीर मार्गदर्शक तत्वां जाहीर करून कृत्रीम तंत्रज्ञानाचे मजतीन ‘डीपफेक’ फोटो वा व्हिडिओ निर्माण करपाचेर आळाबंद हाडलां. ते प्रमाण ‘डीपफेक’ आनी हेर खंयच्याय प्रतिबंधीत सामाना संबंदी वापरप्यांक स्पश्ट सुचोवण्यो दिवप सक्तीचें केलां आनी हे नेम मोडल्यार कायदेशीर कारवाय करपाची शिटकावणी कंपनींक दिल्या.
‘डीपफेक’चे मजतीन खुबश्या नामनेच्या व्यक्तींचे बनावट फोटो वा व्हिडिओ करून सोशियल मिडियाचेर व्हायरल करपाच्या घडणुकांनी वाड जाल्या. हाका लागीन लोकां मदींय भंय निर्माण जाला. तशेंच तंत्रज्ञानाच्या अशे वायट तरेन वापराचेर बंदी घालपाची मागणीय खर जायत चलिल्ली. हे फाटभूंयेर म्हायती तंत्रज्ञान मंत्रालयान हे नेम जाहीर केल्यात.
फुडलीं कांय सप्तकां ह्या मंत्रालया वरवीं सोशियल मिडिया आनी डिजिटलाचेर लक्ष दवरतले. तांतल्या निश्कर्शांच्या आधाराचेर म्हायती तंत्रज्ञान कायद्यांत गरजेचे बदल केल्यात.
व्हॉट्सॲप, फेसबूक, एक्स वा हेर समाजमाध्यमांक म्हायती तंत्रज्ञान कायद्यान बंदी घाल्ले खंयचेय पोस्ट वा स्टोरी घालतना वापरकर्त्यांक सुचवण्यो दिवच्यो पडटल्यो. कायद्यांत बंदी हाडिल्ल्यो गजाली वापरकर्त्यांक तांच्या सोशियमिडियाचेर नोंद करपाच्या वेळार स्पश्ट शब्दांनी सुचीत करच्यो पडटल्यो. तशेंच दरेका लॉगिनाच्या वेळार वा कितेंय पोस्ट करपा वेळार ह्यो सुचवण्यो पाळच्यो पडटल्यो. तातूंत प्रतिबंधीत मजकूर प्रसारा आड कारवाय, कायदेशीर तरतूद, दंड हांचे तपशील वापरकर्त्यांक सांगचे पडटले. नेम तीन(१)(ब) प्रमाण फटींग म्हायती वा वावड्यो पातळावपाक खर बंधन आसतले. हाका लागून खर ख्यास्त भोगची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
