भांगरभूंय | प्रतिनिधी
पाटणा उच्च न्यायालयान मरणाची ख्यास्त केली रद्द
पाटणा, खबरां संस्था ः 12 वर्सां पिरायेच्या चलयेचेर बलात्कार करून तिचो खून करपी मनशाची मरणाची ख्यास्त पाटणा उच्च न्यायालयान रद्द केल्या. पुलिसांचो स्नीफर डॉग हो एकूच आरोपी आड पुरावो आशिल्लो. फकत हो स्नीफर डॉग घरांत भितर सरलो ह्या एका पुराव्याचेर दोशीक ख्यास्त दिवप योग्य थारचें ना अशें स्पश्ट करून उच्च न्यायालयान ख्यास्त रद्द केली.
मजगतीं 2019 वर्सा घडिल्ली ही घडणूक. 12 वर्साचे नेण्टे चली आपले आजये वांगडा देवळांत गेल्ले. तेन्ना नागपंचमीच्या सणा निमतान यात्रा सुरु आशिल्ली. त्याच वेळार देवळा लागसारच्या वाठारांत आरोपीन आनी ताच्या वांगड्यांनी ताचेर बलात्कार करुन तिचो खून केल्लो.
न्यायाधीश आशुतोष कुमार आनी आलोक कुमार पांडे हांच्या खंडपिठान शुक्रारा ही ख्यास्त रद्द केली. सुण्याच्या तज्ञतेचो असो आदार घेतल्यार न्यायालयीन प्रक्रिया परवडची ना अशें खंडपिठान मत मांडलें. सुण्यान कसलीच चूक करुंक ना हे सकयले न्यायालय कशें थारावंक शकतालें असोय प्रस्न खंडपिठान केला. कारण हो स्नीफर डॉग दुसऱ्याय एका घरांत भितर सरलो हाचोय पुरावो आशिल्लो. वास काडीत सोद लावप आनी बारीकसाणेन पळोवप हें सुणो बरें काम करतात हांतूत दुबाव ना तशेंच गुन्यांव तपासाच्या कामांत अशें सुणे पुलिसांक व्हड आदार करतात अशेंय खंडपिठान मान्य केलां. गुन्यांव सोदून काडपाक ते उपेगी पडूं येतात. पूण, ते पुरावे जावंक शकनात अशें मत खंडपिठान उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
