भांगरभूंय | प्रतिनिधी
नवी दिल्ली, खबरां संस्था ः दिल्ली उच्च न्यायालयान 21 डिसेंबराक एका प्रकरणाचे सुनावणे वेळार सांगलें, जिणेंत स्वताची बायल विधवा म्हणून वागता तें पळोवप इतलो त्रासदायक अणभव जावंक शकना आनी अशी वागणूक अत्यंत क्रूरपणाची आसा. एक जोडीदार दुसऱ्याक वैवाहिक संबंदांतल्यान वंचित दवरल्यार अशें लग्न तिगूंक शकना आनी तशें करप हेय क्रूरपणाचे कृत्य जावन आसा. दिल्ली उच्च न्यायालयान कुटुंब न्यायालयाच्या आदेशाक आव्हान दिवपी बायलेची याचिका न्हयकारल्या आनी तिच्या घोवाच्या बाजून घटस्फोटाचो हुकूम मंजूर केला.
घटस्फोटा खातीर घोव-बायलेचे दावे कितें?
मेळिल्ले खबरां प्रमाण, एप्रील 2009 वर्सा ह्या जोडप्याचें लग्न जालें आनी ऑक्टोबर 2011 वर्सा तांकां एक चली जाले. कांय दीस आदीं हे बायलेन आपले सासर सोडले. उपरांत बायलेच्या घोवान कुटुंब न्यायालयांत घटस्फोटाची याचिका दाखल करून लग्न जाले उपरांत ताची बायल ताचे कडेन उदासीन आसा असो दावो केलो. भुरगें जल्माक येवचे पयलीं गेल्ली ती 147 दीस जाले तरी परत आयली ना. तिच्या वैवाहिक जापसालदारकेंत तिका कसलीच आवड ना. घरांतल्या कामांची लेगीत तिणें केन्नाच जापसालदारकी स्विकारली ना, घरांत जेवण रांदपाक बापायक जबरदस्तीन सांगताली. तशेंच ताची बायल ल्हान- ल्हान प्रस्नांचेर राग करताली आनी कुटुंबा कडेन झगडटाली. एक फावट घोवान तिचो मोबायल रिचार्ज करूंक नाशिल्ल्यान तिणें ‘करवा चौथ’ उपास करपाक न्हयकार दिलो असोय दावो तांणी केला. एप्रील 2011 च्या आनीक एके घडणुकेचो उल्लेख करून घोवान सांगलें की, जेन्ना ताका स्लिप डिस्क जाल्लो तेन्ना ताची जतनाय घेवचे बदला ताचे बायलेन कपला वयलो कुकूम पुसलो, कांकणा फोडली आनी धवे कपडे घालून स्वताक विधवा आशिल्ल्याचे जाहीर केलें.
दुसरे वटेन बायलेन घोवाचे आरोप न्हयकारले आनी आपल्या घोवानच आपणाक आवय बापायच्या घरां वचपाक सांगले. पूण 2- 3 दिसां भितर हांव परत आयली असो दावो केलो.
उच्च न्यायालयाचो निर्णय कितें?
‘करवा चौथ’ दिसा उपास करप काय ना हें वैयक्तीक निवड आसूं येता आनी ताका क्रूरपणाची कृती म्हणूंक फावना अशें खंडपिठान स्पश्ट केलां. वेगवेगळे धर्मीक समजुती आसप आनी कांय धर्मीक कर्तव्यां पाळनाशिल्ल्यान क्रूरपण न्हय आनी वैवाहिक संबंद मोडपाक हे कारण पुरो जायना. पूण बायलेची वागणूक आनी सध्याच्या प्रकरणांत घोवान सिध्द केल्ली परिस्थिती पळोवन हिंदू संस्कृतायेंतल्या प्रचलित चालीरितींक पाळो दिवंक नासतना आनी वैवाहिक मनशाचो आदर करप ना हांतूतल्यान बायलेक संबंद तिगोवन दवरपाची इत्सा नाशिल्ली हें सिध्द जालें.
पीटीआयच्या अहवाला प्रमाण न्यायाधीश सुरेश कुमार कैत आनी नीना बन्सल कृष्णा हांच्या खंडपिठान ह्या प्रकरणांत म्हणलां, “घोवाक आपल्या बायलेक विधवा म्हणून वागता तें पळोवप हाच्या परस आनीक वायट अणभव आसूंच शकना. ते लेगीत जेन्ना तो (घोव) गंभीर जखमी जाला आनी ताची बायले कडल्यान काळजी आनी सहानुभूती सोडून हेर कसलीच अपेक्षा ना. बायलेचें अशें वागप घोवा कडेन अत्यंत क्रूरपणाची कृती म्हणूं येता.”
निमाणो निकाल दितना खंडपिठान फुडें सांगलें, घोव-बायलेचो वाद सुटावो जावपाची शक्यताय ना आनी खोटे आरोप, पुलीस अहवाल आनी गुन्यांवकारी कार्यवाही चड काळ चलप हें मानसीक क्रूरपणाची लक्षण आसा अशें पुराव्यां वयल्यान सिद्ध जालां. खंयच्याय वैवाहिक नात्याची बुन्याद म्हळ्यार सोबितकाय आनी वैवाहिक संबंद पूण ह्या जोडप्यांतल्या वैवाहिक विसंगतीक लागून विस्वास, समजूत, मोग आनी आपुलकी पुरायपणान नश्ट जाला. ह्या नात्यात झगडीं, मतभेद आनी लांब खटले हांचेच अस्तित्व उरला. अशें परिस्थितीत हो संबंद तिगोवन दवरपाचो खंयचोय आग्रह दोगांयचेर अन्याय थारुंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
