भांगरभूंय | प्रतिनिधी
नवी दिल्लीः भारतीय पंगड सध्या तिनूय फॉरर्मेटाच्या माळे खातीर दक्षीण आफ्रिका भोंवडेर आसा. दोनूय पंगडान टी-20 आनी वन-डे मॅची खेळ्ळ्यात. जाल्यार टॅस्ट माळेक अजून सुरवात जावंक ना. आतां टॅस्ट माळे पयलीं भारतीय पंगडाक व्हड धपको बसला. स्टार बॅट्समन ऋतुराज गायकवाड दुखापतीक लागून दोन मॅचींच्या टॅस्ट माळेंतल्यान भायर पडला.
तशेंच स्टार बॅट्समन विराट कोहली कुटुंबीक कारणाक लागून मायदेशांत आयला. बीसीसीआयंतल्या सुत्रांच्या म्हायती प्रमाण, कोहली 26 डिसेंबराच्यान सेंच्युरियनांत सुरू जावपी पयले टॅस्टी खातीर जोहान्सबर्गाक वेळांत पावतलो.
विराट काेहली तीन दिसां पयलीं मुंबयक गेल्लो. ते खातीर ताणे बीसीसीआय आनी पंगड वेवस्थापनाची परवानगी घेतिल्ली. कोहली शुक्रारा (22 डिसेंबराक) दक्षीण आफ्रिकेंत परतुपाची शक्यताय आसा. दुसरे कडेन 19 डिसेंबराक पोर्ट एलिझाबेथ हांगा जावपी दक्षीण आफ्रिके आडचे दुसरे वन-डे मॅचीत ऋतुराज गायकवाडच्या बोटाक दुखापत जाल्या. ह्या दुखापतींतल्यान तो अजून बरो जावंक ना.
भारताचो टॅस्ट पंगड
रोहीत शर्मा (मुखेली), शुभमन गिल, यशस्वी जैस्वाल, विराट कोहली, श्रेयस अय्यर, ऋतुराज गायकवाड, केएस भरत (विकेटकिपर), केएल राहुल (विकेटकिपर), रविचंद्रन अश्वीन, रवींद्र जडेजा, शार्दुल ठाकूर, मोहम्मद सिराज, मुकेश कुमार, आकाशदीप, मुकेश. जसप्रीत बुमराह (उपमुखेली), प्रसिध कृष्णा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
