भांगरभूंय | प्रतिनिधी
मिना खणी एकसुऱ्यो पडल्यात, तेन्ना सावन पर्यटन वेवसाय राज्याचो अर्थीक कणो जाला. तो मोडूंक फावना. ते खातीर ‘अतिथि देवो भव’ ही संकल्पना पारदर्शक रितीन, कसलोच दाग लागनासतना मुखार व्हरपाची गरज आसा. पर्यटन मंत्री रोहन खंवटे हांणी ही गजाल बरीच गंभीरतायेन घेतल्या, अशें म्हणल्यार अतिताय जावची ना. कित्याक तर फाटल्या दोन वर्सां सावन ते दर्यावेळांचेर पर्यटकांक त्रास करपी ‘टाव्टस्’ म्हणल्यार दलालां फाटल्यान लागल्यात. गोंयचें सैम, सरबराय आनी संस्कृती अणभवपाक येवपी पर्यटकाक सुरक्षीत वातावरण मेळप गरजेचें आसा. तेन्नाच तो पर्यटक परत एक फावटी गोंयांत येवंक सोदतलो. कडू अणभव मेळ्ळ्यार मात गोंयचें नांव बदनाम करतलो!!!
पर्यटनाच्या मळार गोंयचें नांव बदनाम जालें जाल्यार, पर्यटक गोंय सोडून दुसऱ्या राज्यांनी वचपाक पसंद करतले. हाचो हुस्को सरकारान आदींच उक्तायला. आतां नांव बदनाम करतात कोण? असो प्रस्न उप्रासता… तातूंत एक तर कडू अणभव मेळिल्लो पर्यटक आसता आनी दुसरो म्हणल्यार समाज माध्यमाचेर आपलो प्रभाव वाडोवपाच्या नादांत आशिल्लो ‘सोशल मिडिया इन्फ्ल्युएन्सर’. तांचेरूय कारवाय करपाचें मंत्री खंवटे हांणी उलोवन दाखयलां.
आपलो कडू अणभव मांडपी पर्यटकांच्या कागाळींची दखल गोंय सरकाराच्या गृह खात्यान आदीं घेतल्या आनी कारवाय केल्या. पोरूं फेब्रुवारींत एका जपानी नागरिकाक पुराय सिनेमा स्टायलीन लुटपाचो प्रकार कथीतपणान गोंयांत घडलो. गोंयचो आनंद लुटपाक आयिल्ल्या ह्या विदेशी नागरिकाक तिगां दादल्यांनी आपूण पुलीस आशिल्ल्याचें सांगून ताका लुटलो आनी तो पुलीस कागाळ करचो ना हाची खबरदारी घेतना तांणी ताका बडयलो आनी धमकायलोय. हे दुबावीत गोंयकार न्हय. ते भायल्या राज्यांतले, जे गोंयांत भाड्याक रावून गोंयचेंच नांव बदनाम करतात. तरीय बरें ह्या जपानी नागरिकान मांयघरा पावतकच इमेल करून गोंयच्या पुलिसांक कळयलें आनी तांकां धरपाक येस मेळ्ळें.
हे दलाल दर्यावेळांचेर अशेच भोंवतात. पर्यटकांक ‘रंगीत-संगीत’ आनंद लुटपाचीं आश्वासनां दिवन तांकां थारायिल्ल्या सुवातांचेर व्हरून बडयतात आनी लुट्टात. अश्यो कितल्योश्योच घडणुको जाल्यात आनी ते उपरांत बेकायदेशीर मसाज पार्लरांचेर कारवाय लेगीत जाल्यात. पर्यटक गोंयांत येतकच चडशे उत्तरेंतल्या दर्यावेळांचेर वतात आनी तातूंत चड करून कळंगूटे… हे खातीर हे दलाल थंय चड दिश्टी पडटात. कळंगूट पुलिसांनी अंदूं सुमार 700 दलालांचेर कारवाय केल्या आनी तांकां सबंदीत कायद्या खाला दंड फारीक करपाक पडला. दलाली करतना पयले फावट सांपडल्यार पांच हजार आनी परत परत तेंच बेकायदेशीर काम करतना सांपडल्यार हो दंड पन्नास हजारां मेरेन वचपाक शकतात. आतां ह्या 700 मदीं परत परत गुन्यांव केल्ले दलालूय आसात. हाचो दोन तरेन अदमास काडूं येता, तो म्हणल्यार हांकां कायद्याचो भंय ना वा हो दंड खूब कमी आसा. ताचेर सरकारान विचार करूंक जाय, जर तर गोंयच्या पर्यटन वेवसायाक लागिल्ली ही पिडा हुमटावन भायर उडोवपाची मनांतल्यान इत्साशक्त आसल्यार.
गोंयच्यो दर्यावेळो तश्यो ‘प्रॉस्टिट्युशन’ मुक्त जाल्ल्यो नात आनी हो बेकायदेशीर वेवसाय नेटान चालू आसा अशें म्हणल्यारय तें चुकीचें थारचें ना. रिव्होल्युशनरी गोवन्स पार्टीचे आमदार विरेश बोरकार हांणी गोंय विधानसभेंत ह्या विशयाचेर सरकाराक धारेर धरिल्लें. ह्या दलालांनी तांकांय आडावन ‘लडकी चाहिये क्या’ असो प्रस्न केल्ल्याचें तांणी अधिवेशनांत सांगलां. तशेंच ‘एसकोर्ट सर्वीस’ दिवपी वॅबसायटी बंद करपाची मागणीय केल्ली. गोंयांतल्या खंयच्याय सुवातांनी ‘लडकी’ पावोवपाची तजवीज करपी ह्या वॅबसायटींचेर अजून मेरेन कारवाय जायना. कित्याक तें घडये पुलिसांक आनी सरकाराक खबर आसत. मंत्री रोहन खंवटे हांचे कडेन म्हायती आनी तंत्रगिन्यान खातेंय आसा. तांणी गोंयची बदनामी आडावपा खातीर ह्यो वॅबसायटी बंद करपा खातीर पावलां मारल्यार, गोंयची अशा खातीर जावपी बदनामी आडावं येता.
गोंयच्यो दर्यावेळो म्हणलें म्हणटकच घुंवळे वखदांचो उल्लेख केले बगर जावचें ना. घुंवळे वखदां सर्रास मेळटात आनी तीं गांवागांवांनी पावल्यांत हेंवूय सरकाराक खबर आसा. सरकार ते खातीर कामूय करता. मात तें काम अशें जावंक जाय की केंद्रीय यंत्रणांक हांगां येवन कारवाय करूंक पडपाक जायना. थळाव्या पुलिसांनी आनी अधिकाऱ्यांनी मुळा मेरेन वचून तीं नश्ट करपाक जाय.
पोरूं जानेवारींत कळंगूटे आनी बागा वाठारांतल्या सुमार 500 लोकांनी रस्त्यार देंवून डान्स बार, प्रॉस्टिट्युशन आनी टाव्टस् हांचेर कारवाय करपाची मागणी केल्ली. त्यावेळार उलयतना बायलांनी लेगीत ह्या बेकायदेशीर वेवसायां विशीं हुस्को उक्तायलो आनी ह्या वाठारांत तांकां एकटीं चलून वतना भंय दिसता अशें सांगिल्लें. हाचो अर्थ इतली दहशत ह्या दुसऱ्या राज्यांतल्यान आयिल्ल्या दलालांनी चलयल्या. हाका कोण कोण जबाबदार? मंत्री रोहन खंवटे हांणी आदेश दितकच पुलीस ह्या दलालांक धरपाक लागले. ताचे पयलीं कितें करताले? हे दलाल आदीं कित्याक दिश्टी पडले नात? अशा वेळार चोराक चोरयो कर म्हूण सांगपी पुलीस कॉन्स्टेबलाचेर हालींच कारवाय जाल्ल्याची याद जायनासतना रावची ना
सुमार पंदरा वर्सां फाटीं दक्षीण गोंयांतल्या कोलवा दर्यादेगेर भिकणां, चणे, आयसफ्रूट विकपी भुरग्यां कडल्यान खाकी पॅन्ट आनी वयर भितरलो शर्ट लिपोवपाक रंगीत शर्ट घाल्लो व्यक्ती तांचे कडल्यान हप्ते घेतना दिशिल्लो. हो प्रकार बंद करपा खातीर मध्यस्ती केल्ली तेन्ना त्या खाकीवाल्यान म्हाकाच मारपाचो यत्न केलो. मात तेन्नाचे पुलीस उपमहानिरिक्षक उज्ज्वल मिश्रा हांकां घडिल्ली गजाल सांगतकच, हो खाकीवालो पांयां पडून दुकांनी रडलो. पूण त्या दुकांतल्यान ताची खंडणी करून, हप्ते घेवन सोंपे तरेन पयशे जोडपाची वायट वृत्ती मातयेभरवण जालिना. ताका ते उपरांत बेळगांवच्यान गोंयांत कथीतपणान ‘गांजा’ हाडटना धरलो. अशे वृत्तीचेय मनीस एके तरेचे ‘दलाल’ आसतात हें विसरून जावचें ना.
आपल्या पुलीस स्टेशनाच्या अधिकारक्षेत्रांत जर व्हड प्रमाणांत दलाल भोंवतात आनी पुलिसांचें जर पॅट्रोलींग चालूच आसता जाल्यार हे दलाल ‘दोळ्यां आड’ वचपाक शकच नात. तांकां आलाशिरो दिवपी आनी ते ज्या वेवसायिकां खातीर काम करतात त्या व्यक्तींकूय धरपाची गरज आसा.
आमचें सुपुल्लें गोंय, राजकारण, डिफेक्शन, हाचे खातीर सदांच चर्चेंत आसता. पूण घुंवळे वखदां, प्रॉस्टिट्युशन, पर्यटकांक बडोवप-लुटप, डान्स बार, बेकायदेशीर मसाज पार्लर, जुगार अशे विशय सोशल मिडिया इन्फ्ल्युएन्सरांक मेळपाक जायना हाची खबरदारी घेवंक जाय. पूण जर तर मुद्दाम कोण तरी गोंयचें नांव बदनाम करता जाल्यार ताका तरी आमी कित्याक सोडचो?
(लेखक ‘आयएएनएस’ हे राष्ट्रीय खबरां संस्थेचे गोंयचे मुखेल प्रतिनिधी आसात.)
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
