भांगरभूंय | प्रतिनिधी
सांगें: समाजीक, शिक्षणीक, साहित्य, भलायकी, सांस्कृतीक मळार बरी कामगिरी केल्ले, आनी हेर खंयच्याय मळार मना पसून योगदान दिवपी कुडचडेंचे युवा समाजसेवक प्रतीक प्रभाकर वस्त हांकां मुख्यमंत्री डॉ. प्रमोद सावंत हांचे हस्तुकीं उत्कृश्ट समाजसेवक म्हूण भोवमानीत केलो.
हो पुरस्कार तांकां गोंय मुक्ती दिसा निमतान ताळगांवां गोंय विद्यापीठ मैदानार आयोजीत केल्ल्या सुवाळ्यांत भेटयलो.
तांणी स्वताच्या जबाबदारीचेर सांस्कृतीक कार्यावळ, मॅडिकल कॅम्प, बॅग मेकींग, मास्क मेकींग, ज्वेलरी मेकींग, दांडिया आनी फळां पसून वेगळेवेगळे डीश तयार करप कार्यशाळा आयोजीत केल्यात. तशेंच तांणी कोवीड काळांत मास्क आनी कड्डण, भाजी आनी हेर साहित्याचें वांटप केलां.
ते युवा स्वराज, श्रीकुलदेव बेताल वस्त कुटुंबाचे अध्यक्ष, सतीदेवी देवस्थानाचे आदले अध्यक्ष, संतोषी माता देवस्थानाचे वांगडी म्हूण कार्यरत आसात. तांच्या कार्याची दखल घेवन कला वैभव सांगें, कुडचडें जेसीआय, आमदार निलेश काब्राल, खेळां मंत्री गोविंद गावडे, समाज कल्याण मंत्री सुभाष फळदेसाय, सभापती रमेश तवडकार, आदले उपमुख्यमंत्री चंद्रकांत कवळेंकार, राज्यसभा वांगडी सदानंद तानावडे, आदले राज्यसभा खासदार विनय तेंडुलकार, नगरसेवक विस्वास सावंत हांणी तांकां भोवमानीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
