भांगरभूंय | प्रतिनिधी
कांय दिसांनी आमी 2023 वर्साक निरोप दितले आनी 2024 वर्साक येवकार. 2023 वर्स सोंपचे पयलीं जायतीं कामां आमकां पुराय करची पडटली. तुमी आयटीआर दाखल करूंक ना जाल्यार 31 डिसेंबराच्या आदीं दाखल करात. तशेंच डिमॅट आनी म्युच्युअल फंडाचे नामांकन 31 डिसेंबर पयलीं थारावचे पडटले. कंपनींक बंद केल्लो यूपीआय आयडी परतून सक्रिय करचो पडटलो. तुमी बँक लॉकराच्या नवें कराराचे सय करुंक ना जाल्यार तुमकां तेंय करचें पडटलें.
डिमाट खातें आनी म्युच्युअल फंड नामांकन
26 सप्टेंबराक सेबीन सद्याच्या डिमॅट खातेंधारकांक नामांकन पर्याय दिवपाची मुजत तीन म्हयन्यांनी वाडोवन 31 डिसेंबर 2023 मेरेन दिल्ली. ते भायर सेबीन पॅन, नामांकन, संपर्क तपशील, बँक खात्याचो तपशील आनी तांच्या फोलियो क्रमांका खातीर नमुन्यांची स्वाक्षरी व्यक्तिगत रितीन सादर करपाक 31 डिसेंबर मेरेन वेळ दिला.
निश्क्रीय यूपीआय आयडी
नॅशनल पेमेंट्स कॉर्पोरेशन ऑफ इंडियान (NPCI) 7 नोव्हेंबराच्या परिपत्रकांत पेमेंट अॅप्स आनी बँकांक ते यूपीआय आयडी आनी क्रमांक सक्रिय करपाक सांगलां, जे एक वर्सा परस चड काळ निश्क्रीय आसात. दरेक बँक आनी थर्ड पार्टी अॅपाक 31 डिसेंबर मेरेन पाळो दिवचो पडटलो.
बँक लॉकर कबलात
भारतीय रिझर्व्ह बँकेच्या म्हणण्या प्रमाण सुरक्षीत डिपॉझिट लॉकरांच्या नव्या नेमा प्रमाण गिरायकांनी आपल्या बँकां कडेन नवी कबलात करप सक्तीचें थारतलें. जो मेरेन गिरायक भाडें फारीक करतात तो मेरेनच लॉकर वापरपाक मेळटात. ही कबलात करपाची निमाणीं तारीख 31 डिसेंबर 2023 आसा.
आयकर रिटर्न दाखल करप
वित्तीय वर्सा 2022-23 खातीर दंडासयत येणावळ कर रिटर्न दाखल करपाची निमाणी तारीक 31 डिसेंबर 2023 आसा. येणावळ कर कायद्याच्या कलम 234F खाला, दिल्ल्या तारखे आदीं रिटर्न दाखल करुंक नाशिल्ल्या व्यक्तीं आड कारवाय करतात. आयटीआर उसरा दाखल करप्यांक 5 हजार रुपया दंड घालतात. पूण ज्यांची वट्ट येणावळ पांच लाखां परस उणी आसा तांकां फकत एक हजार रुपया दंड भरचो पडटलो.
सिम कार्डा खातीर कागदाचेर आदारींत केवायसी ना
मोबायल फोन वापरप्यांक 2024 वर्साच्या पयल्या दिसा कागदी फॉर्म भरले बगर नवे सिम कार्ड जारी करपाक मेळटलें. दूरसंचार खात्याच्या (डीओटी) अधिसुचोवणे प्रमाण कागदाचेर आदारीत केवायसी प्रक्रिया सुरू जातली. म्हणल्यार 31 डिसेंबर मेरेन सिम कार्ड फकत प्रत्यक्ष स्वरूपात मेळटले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
