कोरोनाची नवी पनवत

भांगरभूंय | प्रतिनिधी

कोरोना विशाणू म्हणल्यार कितें आनी ताचे धामीन भारतांत कितलें व्हडलें धुमशेण घालें तें सगल्यांकूच खबर आसा. दरेका वाड्यार 2- 3 लोकांक कोरोनाक लागून मरण आयलां. लागीं- लागीं 60 टक्के लोकांक कोरोनाची बादा जाली, अशें म्हणल्यार अतिताय थारची ना. देशांत 4,50,03,830 भारतीयांक कोरोना जालो, तातूंतले 5,33,309 लोक संवसाराक अंतरले. मनशाचें जिवीत, राज्याची अर्थवेवस्था, समाजीक जीण हे धामीन बदलून उडयली. 2020 ते 2022 मेरेन कोरोनान आमकां सतयले. फाटलें वर्सभर सगलें शांत आशिल्लें. मात आतां परतून कोरोनान कूस परतिल्या. नेमकी नातलांच्या वेळार. गोंयांत नव्या जेएन 1 व्हेरियंटाचे 18 दुयेंती सांपडल्यात. पर्यटनाचे नदरेन डिसेंबर सामको म्हत्वाचो, हें आमी विसरूंक फावना. ह्याच दिसांनी दर्यावेळांचेर गर्दी जाता. साबार तरांच्यो कार्यावळी, महोत्सव जातात. म्हणटकच लोक एकठांय येतलेच. ताका लागून आमी हो नवे जातीचो कोरोना पातळचो ना हाची आपापले परीन जतनाय घेवया.
गोंयांत अचकीत कोरोनान तकली वयर काडपाचें कारण इफ्फी. थंय हजर आशिल्ल्या कांय जाणांक हाची लागण जाल्या खंय. कालूच केंद्रीय भलायकी मंत्री मनसुख मांडविया हांणी व्हिडिओ काॅन्फरन्सिंगा वरवीं राज्यांच्या भलायकी मंत्र्यांची बसका घेतली. तांकां कांय उपाय घेवपाक सांगलें. जांकां जोर येता, तांणी कोरोनाची चांचणी करपाचो सल्लो सरकारान दिला. ते खातीर जिल्हो हाॅस्पिटलांनी फ्ल्यू क्लिनिकां सुरू करतले. दरेका हाॅस्पिटलांनी आतां मास्क बंधनकारक केल्यात. जांकां हो नवो कोरोना जाला, तांची भलायकी बरी आसा. स्थिती नियंत्रणा खाला आसा. हुस्को करपा सारकी स्थिती ना, अशें मुख्यमंत्री डाॅ. प्रमोद सावंत हांणी सांगलां. तशें आसलें तरी कोरोनाच्या उज्या कडेन खेळ नाकात!
नातलांच्या दिसांनी मिसां, काले, जात्रा जावपाच्यो आसात. सध्या चालू आसात. लग्नांय जातात. संगिताच्यो कार्यावळी तर दरेके दर्यावेळेर चलतात. सनबर्न, पर्पल फेस्त आसा. हाका वेगळ्यावेगळ्या राज्यांतल्यान, देशांतल्यान लोक येतले. तांचेर नदर दवरची पडटली. शिस्त ही खंयचेय परिस्थितींत पाळचीच पडटली.
फाटले खेपेचो कोरोना केरळांतल्यान जानेवारी 2020 त सुरू जाल्लो. थंय पयलो दुयेंती मेळिल्लो. मागीर तो सगले कडेन पातळ्ळो. ह्या नव्या व्हेरिएंटांनूय हांगाच पयलें पावल दवरलें. फाटल्या सप्तकभरांत थंय पांच लोकांक मरण आयलां. मात ते जेएन 1 क लागून काय हेर तरेच्या कोरोनाक लागून तें स्पश्ट जावंक ना. कर्नाटकान आपल्या राज्यांतल्या नागरिकांक गर्दी आसा त्या जाग्यांचेर वच्चे न्हय, तशेंच भौशीक जाग्यांचेर मास्क घालपाचे आदेश दिल्यात. तमीळनाडूंतय कोरोना पसून सुरक्षेचे उपाय घेवप सुरू जालां…. आनी आतां गोंयांत ह्या नव्या कोरोनाचे 18 दुयेंती सांपडल्यात. चडशे घरांतल्यानूच उपचार घेतात. संवसारीक भलायकी संघटणेन ह्या जेएन 1 व्हेरियंटाचें ‘व्हेरियंट ऑफ इंटरेस्ट’ गटांत वर्गीकरण केलां. ‘व्हेरियट ऑफ कन्सर्न’ चड धोक्याचो. जेएन 1 हो भलायकेक व्हडलोसो धोको निर्माण करिना. सध्या आशिल्लें वासीन, उपचार ताचेर चलतात, अशेंय भलायकी संघटणेचें मत. पूण तरीय केरळांत लोक मेल्यात म्हणटकच, ही भिवपाची गजाल.
शिंयाच्या दिसांनी कोरोना पातळटा, अशें जायते वैज म्हणटात. पूण गोंयांत मे म्हयन्यांत कोरोनाक लागून चड लोक मेल्यात. सध्याची कोरोनाची ही नवी पनवत चीन, अमेरिका आनी युरोपांत पातळ्ळ्या… आनी आतां आमच्या भारतांत. 11 डिसेंबराक जेएनाचे 938 दुयेंती आशिल्ले. पूण 19 डिसेबराक तांचो आंकडो वाडून 1970 जालो. म्हणल्यार णव दिसांनी दुपेट वाड. कोरोना म्हणल्यार अर्थवेवस्थेचेर संकश्ट. गोंयांत पर्यटन मोसमाचेर कोरोनाची वांकडी नदर गेली जाल्यार कितें जातलें तें सांगपाक येना. चार्टर विमानां सुरू जाल्यांत, नातलां, नव्या वर्सा निमतान देशी, विदेशी पर्यटक आयल्यात. येवपाचे आसात. तेन्ना सरकारी यंत्रणांनी हें कोरोना प्रकरण गंभीरपणान घेवचें. पर्यटक, खास करून कानांत वारें भरिल्ल्यांनी विचार करचो. जीव आसल्यार जाय तितली मजा करूं येता. सगल्यांनी आपूण जावन कोरोनाचे नेम पाळप बरें. आमचे आनी दुसऱ्यांचेय भलायके खातीर इतलें करुंयाच.