भांगरभूंय | प्रतिनिधी
मुंबय, खबरां संस्था ः फामाद चित्रकाराचीं चित्रां आशिल्ल्याचें सांगून 52 वर्सां पिरायेच्या मनशाची सुमार 18 कोटी रुपयांची फटवणूक केल्ल्या प्रकरणात ताडदेव पुलिसांनी दोगा आड गुन्यांव नोंद केलां. कागाळदारांक नामनेच्या चित्रकारांचीं चित्रां आसात अशें सागून 11 चित्रां विकली.
ताडदेव रावपी पुनीत भाटिया (52) हे गुंतवणूकदार म्हणून काम करता. 2022 वर्सा तांच्या इश्टाचे पार्टेंत तांची वळख एका तरणाट्या कडेन जाल्ली. मध्य प्रदेशांतल्या राजेश राजपाला वरवीं नामनेच्या चित्रकारांचीं चित्रां मेळटलीं अशें उतर ताणें दिलें. हे व्यक्तीन 23 जानेवारी 2023 दिसा भाटिया कडेन संपर्क सादलो. फामाद चित्रकार मनजीत बावाचें कृष्णाचें चित्र सुब्रत बॅनर्जी ह्या निवृत्त चार्टर्ड अधिकारीच्या ताब्यांत आसा आनी ताची किंमत 6.75 कोटी रुपया आसा अशें तांणी भाटियाक सांगलें. तशेंच भाटियाक पावणे दोन कोटी रुपयांचें फ्रान्सीस न्यूटन सोझा हांचे चित्र दाखयलें. भाटियान दोनूय चित्रां विकतीं घेतलीं. ते उपरांत भाटियान वेगवेगळ्या चित्रकारांचीं नांवां आयकून राजपाला कडल्यान 11 चित्रां विकतीं घेतलीं. भाटियान चॅका वरवीं 17 कोटी 90 लाख रक्कम भरली.
ती चित्रां भाटियान दिल्लींतल्या आपल्या घरांत लायलीं. त्या वेळार भाटियाक ती चित्रां मूळ चित्रकारांचीं न्हय अश्यो प्रतिक्रिया मेळपाक लागलो. ताणें बॅनर्जीक ह्या चित्रां विशीं विचारलें. आपले कडेन अशें चित्र नाशिल्लें. तशेंच तें चित्र आपूण कोणाकच विकूंक ना अशेंय तांणी सांगलें. ते खातीर भाटियान सांताक्रूझांतल्या सिग्नेचर एक्सपर्ट कंपनी कडल्यान चित्रांचेर आशिल्लीं स्वाक्षरी सत्यापीत केली तेन्ना भाटियाक तीं चित्रां बनावट आसात असो अहवाल मेळ्ळो.
राजपाल आनी इश्टाच्या पार्टीत वळख जाल्ल्या व्यक्तीन आपणाक फटयलें हें कळटकच भाटियान ताडदेव पुलिशेंत कागाळ केली. ते प्रमाण ताडदेव पुलिसांनी फटोवप, फट सय करप, कट रचप अशा वेगवेगळ्या कलमा खाला गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
