भांगरभूंय | प्रतिनिधी
खबरां संस्था
कॅनबेराः जोहान्सबर्गांतले पयले वन-डें 8 विकेटींनी जाल्ले एकतर्फी हारीचो बदलो दक्षीण आफ्रिकेन दुसरे वन-डेंत भारताक 8 विकेटींनी हारोवन घेतलो. ओपनर टोनी डे झोर्जी तांच्या ह्या जैताचो शिप्लकार थारलो. ताणे नाबाद शेकडो केलो तशेंच पयले विकेटी खातीर रिझा हॅन्ड्रीक्सा वांगडा 130 धांवड्याची भागिदारी करून पंगडाच्या व्हड जैताचें मुळावण घातलें. रासी डुसानाक वांगडा घेवन ताणे पंगडाक एक हाती जैत मेळोवन दिलें. 9 चौके आनी 6 सक्यांनी ताणे केल्ल्या नाबाद (119) शेंकड्याक लागून 1 आवट 215 धांवड्यो करून भारताचेर 8 गड्यांनी जैत मेळयलें. जैताच्या हुमऱ्यार आसना डुसानान (36) रिंकू सिंगान कॅच आवट केले. भारताक मेळल्ली ही दुसरी विकेट.
भारताक 211 धांवड्यांत गुठलायल्या उपरांत रिझा हॅन्ड्रीक्स आनी टोनी डे झोर्जीन दक्षीण आफ्रिकेक जैताक फावोशी सुरवात करून दिली. भारताच्या बॉलरांक घाम काडटना तांणी पयले विकेटी खातीर 130 धांवड्यांची भागिदारी केली. ही ओपनींग जोडी फोडपाक कॅप्टन केएल राहुलना पांच बॉलरांक बॉलींग दिली. निमाणे अर्शदीप सिंगाक तातूंत येस आयलें. ताणे हॅन्ड्रीक्सान मुकेश कुमारा वतीन कॅच आवट केलें. 7 चौक्यांनी ताणे अर्द शेंकडो (52) केलो. 29.2 ओव्हरींत दक्षीण आफ्रिकेचो बोर्डाचेर अर्द शेंकडो लागलो तेन्ना तांच्या जैताची सुलूस लागली.
सुदर्शन, राहुलाचे अर्द शेंकडे
ओपनर साई सुदर्शन आनी कॅप्टन केएल राहुल हांच्या अर्द शेंकड्यांक लागून सेंट जॉर्ज पार्क स्टेडियमार टॉस हारले उपरांत भारताक आपल्या डावांत 46.1 ओव्हरींत कश्यो बश्यो 211 धांवड्यो केल्यो. ओपनर ऋतुराज गायकवाड (4) आनी तिलक वर्मा (10) रोखडेच आवट जाल्या उपरांत 2 आवट 46 उपरांत सुदर्शन आनी राहुलान तिसरे विकेटी खातीर 68 धांवड्यांची भागिदारी करून डाव साल्वार केलो. 83 बॉलांत 7 चौके आनी एक सक्यान 62 धांवड्यो करपी साई सुदर्शनाक विलियम्सान कॅच आवट केलें आनी उपरांत भारतीय डावाची घसरगुंडी सुरू जाली. नांद्रे बर्गन (3), ब्युरन हेन्ड्रीक्स (2) आनी केशव महाराज (2) हांणी ही कामगिरी केली. विलियम्स आनी मार्कमान दरेकी एक विकेट घेतली.
3 बाद 114 उपरांत 186 धांवड्यो जाय म्हणसर भारताचे मदले फळयेंतल्यो 5 विकेटी पडल्यो. संजू सॅमसन ( 12), रिंकू सिंग (17), अक्षर पटेल (7), कुलदीप यादव (1) हे फकत हजेरी लावन आयलें. राहुलान 64 बॉलांत 7 चौक्यांनी 56 धांवड्यो केल्यो. पंगडाच्या 167 धांवड्याांचेर तो आवट जालो. टेल एंडरांनी भारताक 200 धांवड्यां मेरेन पावयलें. निमाण्या 38 बॉलांत एक विकेट वोगडान 34 धांवड्यो केल्यो ताका लागून भारत 211 धांवड्यो करपाक शकलो. अर्शदीपान 18 धांवड्यो केल्यो. आवेश खान (9) आनी मुकेश कुमार (4) नाबाद उरले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
