भांगरभूंय | प्रतिनिधी
बीच, कसिनो, धागडधिंगाणो म्हणल्यार गोंय न्हय म्हणपाचें सगळेच जाणात. फक्त नकळो तें आमचें सरकार. घडये सरकारूय जाणा आसत पूण येणावळ मेळची म्हणून कानार केंस काडून बसल्यात आसूंक जाय. आमच्या पर्यटन मंत्र्याक तरी वयर सांगलां तें गोंय न्हय म्हणपाचें कळ्ळां. तांणी हालींच तें उलोवनूय दाखयलां. पूण फक्त उलोवन कसलो फायदो? एके वटेन बीच, कसिनो, धागडधिंगाणो म्हणल्यार गोंय न्हय म्हणपाचें आनी दुसरे वटेन सनबर्न करूंक परवानगी दिवपाची. सनबर्न तसो कोणाकूच नाका तरी दर वर्सा तो घडटा. अंदूं तर एका आमदारानूच लोकांक नाका म्हणून एक दीस देंवोवन घेतलो म्हणटकूच पळेयात. दत वर्सा परवानगी दिवचे नात म्हणटनाच तांकां परवानगी मेळटा. तशी तांकां परवानगेची गरजूय ना म्हणात. कारण सरकार करूंक दिवचें ना म्हणटा आनी ते करून दाखयतात. गोंयांत सरकार आसा काय ना असो प्रश्न पडपा सारकी परिस्थिती. कोणतरी भायल्यान येता, आपणांक जाय तशे वागता. कसलीच परवानगी नासतना तीन तीन दीस गांवच्या लोकांची न्हीद ना करता. आवाजाचें प्रदुशण वाडयता. कोट्यांनी जोडटा आनी सरकाराक कूय कूय करीत नाच जाता. सरकार कारवाय करतलें, हें असलें सोंसून घेवचे ना म्हणत
उरलें. कोणाचेरूच कसलीच कारवाय जाल्ली दिसना. जर
सरकाराक येणावळ मेळना जाल्यार हो धागडधिंगाणो गोंयांत जायच कित्याक?
जून म्हयन्यांतल्यान सनबर्न कानार पडूंक लागता. हें लोकांच्या कानार पडटा, सरकाराच्या न्हय. दर वर्सा हें घडुनूय सरकार ‘हाताची घडी अन तोंडावर बोट’ दवरून ओग्गी आसता. कोणेय बोवाळ केलोच जाल्यार आमी कशीच परवानगी दिवचे नात म्हणून सांगतात. पूण आयोजकांक गा खंय कोणाचें पडलां? तांकां शेवट आपणाक जाय तसोच गोड जातलो म्हणपाचें खबर आसता. मागीर घालना कोणूय कितलोय बोवाळ. ते सनबर्न करून दाखयताच. निमाण्या खिणांक तांकां परवानगी मेळटा. कशी तें ते आनी सरकार जाणा.
फाटल्या वर्सा जाल्यार खंय सनबर्न बेकायदेशीर जालो म्हणपाचें कोर्टानूच सांगलां. लागसार रावपी लोकांच्या फक्त न्हिदेचेंच खोबरें न्हय जाल्यार त्या लोकांच्या घरांच्यो वणटी हालपा सारकें संगीत. हो धागडधिंगाणो न्हय जाल्यार कितें? चवथ, दिवाळी, नातलां सारक्या परबांक फोग लावचो न्हय कारण तातूंतल्यान प्रदुशण जाता म्हूण सांगप्यांक हें आवाजाचें प्रदुशण कशें दिसना काय? मोन्या जनावरांक फोगाच्या आवाजान त्रास जाता हें सामकें मान्य. पूण हांगा तर जित्या जागत्या लोकांक त्रास जाता, कान फुटपाची परिस्थिती येता ताचें कोणाक पडून वचूंक ना. आनी हें कित्याक तर पर्यटन वाडोवपाक. आनी पर्यटन मंत्रीच तर सांगता हें गोंय न्हय म्हणून. मागीर हाका परवानगी मेळटाच कशी? कोण दिता ती आनी कोणाच्या
फायद्याक?
अंदूं खंय फक्त धा वरां मेरेन सनबर्न करूंक मेळटलो म्हणपाचें सरकारान म्हणलां. आतां हीं धा रातचीं काय सकाळचीं तें सनबर्न जातकूच कळटलें. जर रातच्या धांक नाचप बंद जातलें जाल्यार थंयच्या होटेलवाल्यांनी एकतीस तारखेच्या सनबर्नाक
कित्याक विरोध केलो? आमचो धंदो चलचो ना, होटेलांक
गिरायक मेळचें ना अशें कित्याक सांगलें? कारण तांकांय खबर
आसा हीं धा वरां दुसरे दिसाचो सुर्या उदेले बगर येवचीं नात. एकदां सनबर्न सुरू जालो म्हणजे ताचेर कोणाचेंच नियंत्रण आसचें
ना हें सगळ्यांक अणभवान कळ्ळां. कार्नावालाक जशें किंग मोमोचें राज्य आसता तशेंच सनबर्नाचेर धागडधिंगाणो घालप्यांचेंच राज्य आसता.
सद्याक तरी कोर्टान सरकाराचेर बडी मारल्या. सनबर्न वा असल्या इव्हेंटां वेळार कितें करप हाचीय सुचोवणी दिल्या. कोणूच हाका ताका बोट दाखोवन नामानिराळो रावचो ना हाचीय जतनाय घेतल्या. पळोवया आतां तरी ह्या धागडधिंगाण्याचेर नियंत्रण येता जाल्यार. अश्या वेळार एक प्रश्न पडले बगर रावना. सगळें जर कोर्टान करपाचें जालें जाल्यार सरकार म्हणटात तें जायच कित्याक? लोकांनी सरकार वेंचून दिवचें तरी कित्याक? धोरण म्हणटात तें सरकारान तयार करचें आसता. तेंच जर करूंक जमना, कोणाचेरूच कसलेंच नियंत्रण दवरूंक जमना, दर एके गजालीक लोकांक कोर्टाचें दार वाजोवचें पडटा जाल्यार ह्या सरकाराची गरज कितें उरता?
आतां हेंच पळयात, फाटल्या वर्सा ध्वनिप्रदुशण नेम मोडले म्हणून कारणां दाखय नोटीस धाडिल्ली. नवो सनबर्न आयलो. वर्स उलगलें म्हणल्यार जाता, सरकारान कितें कारवाय केली? सरकाराचे नोटिसेक सनबर्न जाळवणदारांनी जाप तरी दिल्या आसतली काय? काय नोटिसीचें व्हडें करून दर्यांत सोडलें बी. जे लोक बेकायदेशीरपणान सनबर्न घडोवन हाडटात आनी तांचें सरकार कांयच करूंक शकना ते असल्या नोटिसांक कोंताक धरतले? सरकाराच्यान तांचेर कारवाय करूंक जायना काय सरकाराक ती केल्ली नाका आनी ह्यो नोटिसी बी फक्त लोकांच्या दोळ्यांक उदक लावंक धाडपाच्यो? पर्यटन मंत्र्यान फक्त गोंय म्हणल्यार धागडधिंगाणो न्हय हें सांगलें म्हणून उपकारचें ना. हो धागडधिंगाणो बंद करून दाखोवचो
पडटलो.
गोंयांत एकावेळार लोक येताले ते हांगच्यो नितळ आनी शांत दर्यावेळो पळोवंक. दर्याचो गाज आयकूंक. रापणी ओडपी रापणकार पळोवंक. पर्यटक येताले गोंयचें सैम आनी सोबितकाय पळोवंक. आज कित्याक येतात? कोणें हें नवें गोंय तयार केलें? कोणाक लागून गोंयचें नांव पेड्डेर जालें? कोणे हाडले कसिनो गोंयांत? देवभुमीक, भोगभुमी करून कोणे उडयली? कोण दितलो हाच्यो जापो? गोंय म्हणल्यार कितें तें कोणे राजकारण्यान आमकां सांगचेली गरज ना. तांणी फक्त गोंयची वाट लावचे नात इतलेंच चिंतल्यार पुरो.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
