भांगरभूंय | प्रतिनिधी
हांगाच्या पर्थ स्टेडियमाचेर येजमान ऑस्ट्रेलिया पंगडा आड पयली टॅस्ट खेळपी पाकिस्तानाचो पंगड तिसऱ्याच दिसा चेपणाखाला आयलो. ऑस्ट्रेलियेन पयल्या डावांत डॅव्हिड वॉर्नराच्या शेंकड्या नेटार 487 धांवड्यो केल्यो, जाल्यार पाकिस्तानाचो पयलो डाव फकत 271चेर सोंपलो.
पाकिस्तानाक बरी सुरवात मेळिल्ली. एका वेळार ताणें 2 विकेटी वगडावन 133 धांवड्यो केल्ल्यो. पूण, उपरांत बॉलरांनी आपल्या पंगडाक मॅचींत हाडलो. तिसऱ्या दिसाचो खेळ सोंपलो त्या वेळार ऑस्ट्रेलियेन 2 विकेटी वगडावन 81 धांवड्यो केल्यात. ताचे कडेन सध्या 300 धांवड्यांची आघाडी आसा.
पाकिस्तानान तिसऱ्या दिसाची सुरवात 2 बाद 130 धांवड्या वयल्यान केली. पूण, सकाळचें सत्र ताचे खातीर फायदेशीर थारलें ना. खुर्रम शहजाद फकत सात धांवड्यो करून पॅट कमिन्साच्या बॉलाचेर बोल्ड जालो. सावद शकील 28 धांवड्यो केल्यो. मुखेली बाबर आजम कांय प्रमाणांत आत्मविस्वासान खेळटालो. पूण, ताका लेगीत व्हड खेळी करपाक जमली ना. ताणें 21 धांवड्यो केल्यो. एक बाजू सांबाळून खेळपी इमाम उल हकान लेगीत अखेरेक आपली विकेट वगडायली. ताणें 199 बॉलांनी चार चवक्यांचे मजतीन 62 धांवड्यो केल्यो. ताका स्पिनर नॅथन लायनान बाद केलो.
ऑस्ट्रेलिये वतीन मिशेल स्टार्कान 68 धांवड्यो दिवन 2, जोश हेझलवुडान 49 धांवड्यो दिवन 1, मुखेली पॅट कमिन्सान 35 धांवड्यांनी दोन जाल्यार नॅथन लायनान 66 धांवड्यो दिवन तीन म्हत्वाच्यो विकेटी घेतल्यो.
दुसऱ्या डावांत ऑस्ट्रेलियेक सुरवातीक दोन धपके बसले. डॅव्हिड वॉर्नर शुन्याचेर बाद जालो, जाल्यार मार्नस लाबुशेन 2 धांवड्यो करून तंबूंत परतलो. ते उपरांत उस्मान ख्वाजा आनी स्टिव स्मिथ हांणी डाव सांबाळ्ळो. दोगांयनी आनीक विकेट पडपाक दिली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
