भांगरभूंय | प्रतिनिधी
संवसारीक ज्युनियर हॉकी सर्तीचे कांश्या पदका खातीर जाल्ले प्ले ऑफ मॅचींत भारताक स्पेना कडल्यान 1-3 अशी हार घेवची पडली. हे हारीक लागून पॉडियमांत सुवात मेळोवपाचें भारताचें सपन भंगलें. स्पेना वतीन निकोलस अल्वारेजान 25व्या आनी 51व्या मिनटाक गोल केले, जाल्यार एक गोल पेटचामे पाउ हाणें 40व्या मिनटाक गोल केलो. भारता वतीन एकोडो गोल सुनील जोजोन 28व्या मिनटाक पॅनल्टी कॉर्नराचेर केलो. पॅनल्टी कॉर्नराचेर गोल करपाचें उणाकपण कालचे मॅचींत लेगीत स्पश्टपणान जाणावलें.
भारताक सर्तींत स्पेना आड दोन खेपे हार घेवची पडली. गट पांवड्यार लेगीत भारताक स्पेना कडल्यान हार घेवची पडिल्ली. 2021त ओडिशाचे भुवनेश्वर शारांत संवसारीक ज्युनियर हॉकी सर्त जाल्ली. त्या वेळार लेगीत भारताक चवथे सुवातेर समाधान मानचें पडिल्लें.
स्पेनान पुर्ण मॅचींत आपलो शेक दवरिल्लो. जर भारताचो गोलकीपर मोहित शशिकुमारान पयल्या अर्दांत कांय उत्कृश्ट बचाव करूंक नाशिल्ले, जाल्यार हारीचें अंतर आनीक व्हड आसतलें आशिल्लें. मोहितान 33व्या मिनटांत दोन खेपे उत्कृश्ट बचाव केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
