भांगरभूंय | प्रतिनिधी
भारताच्या क्रिकेट पंगडाचो अश्टतासांचो खेळगडो हार्दीक पांड्या इंडियन प्रिमियर लिगेच्या (आयपीएल) 2024च्या हंगामांत मुंबय इंडियन्स पंगडाचें फुडारपण करतलो. मुंबय इंडियन्साक पांच खेपे वस्तादपण मेळोवन दिवपी रोहित शर्माची तो सुवात घेतलो अशी म्हायती मुंबय इंडियन्सान दिली. पूण, रोहित शर्माचे भुमिके विशीं कांयच स्पश्टपणान सांगूंक ना. फ्रॅंचायजीन 19 दिसां पयलीं गुजरात टायटन्सा कडल्यान 15 कोटी रुपयांनी आपल्या पंगडांत घेतिल्लो. तेन्ना सावन तो मुंबय इंडियन्साचो मुखेली जातलो अशी चर्चा आशिल्ली.
पांड्यान गुजरात टायन्साक पदार्पणाच्या हंगामांत किताब जिखून दिल्लो. 2022त गुजरात वस्ताद थारिल्लो, जाल्यार 2023त ताका उप वस्तादपणाचेर समाधान मानचें पडिल्लें. पांड्या गेल्या उपरांत गुजरात टायटन्सान शुभमन गिलाक मुखेली केलो.
हार्दिक पांड्या मुंबय इंडियन्साचो पांचवो मुखेली आसतलो. ताचे पयलीं रोहित शर्मा, रिकी पॉण्टिंग, हरभजन सिंग आनी सचिन तेंडुलकर हाणें मुंबय इंडियन्साचें फुडारपण केल्लें.
मुंबय इंडियन्स आयपीएलांतलो सगल्यांत येसस्वी पंगडांतलो एक आसा. ताणें पांच खेपे वस्तादपण जोडलां. ताणें आनी चेन्नय सुपरकिंग्सान दरेकी पांच खेपे किताब जिखला. चेन्नय सुपरकिंग्स स खेपे उपवस्ताद लेगीत थारला. जाल्यार मुंबय इंडियन्साक फकत एकदाच उप वस्तादपणाचेर समाधान मानचें पडलां. ताका लागून चेन्नय सुपरकिंग्स आयपीएलांतलो सगल्यांत येसस्वी पंगड आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
