भांगरभूंय | प्रतिनिधी
भांगरभूंय । बातमीदार
पणजी : आयज शेनवारा आनी फाल्यां आयतारा झारखंडांतल्या रांची शारांत जावपी दोन दिसांचे राष्ट्रीय परिशदेंत गोंयचे वट्ट 14 लेखक, संशोधक, आदिवासी कार्यकर्ते आनी भास संशोधक वांटो घेतले. काल शुक्रारा ते दाबोळे विमानतळा वयल्यान थंय वचपाक भायर सरले.
भारताच्या स्वातंत्र्या उपरांत रोखडेंच जाल्ल्या अमानुष खरसांवा हत्याकांडाक 75 वर्सां पुराय जाल्ल्यान दिल्लीच्या डॉ राम मनोहर लोहिया रिसर्च फावंडेशनान अंदूं रांचींत चवथें राष्ट्रीय विचार मंथन घडोवन हाडलां.
1 जानेवारी 1948 दिसा हें हत्याकांड जाल्लें आनी ओडिशा राज्यांत आपलो आस्पाव केल्ले खातीर निशेध करपाक खरसांवा हांगा जमिल्ल्या 30,000 आदिवासी लोकांच्या गर्देचेर पुलिसांनी केल्ल्या फारपेटांत सुमार 500 आदिवासी शहीद जाल्ले. ह्या वेळार पयलेच खेपे थंय धांवून गेल्ल्या डॉ. लोहिया हांणी जालियनवाला हत्याकांडा परसूय निर्दयी अशें म्हणून हे घडणुकेचो निशेध केल्लो.
दोन दिसांच्या परिशदेचें उक्तावण झारखंडाचे राज्यपाल सी पी राधाकृष्णन आनी राज्यसभा उपाध्यक्ष हरिवंश हे शेनवारा 16 डिसेंबराक ऑड्रे हावसाच्या बिरसा मुंडा पुरणचंद मंचाच्या सभाघरांत करतले.
हे बसकेंत जावपी वेगवेगळ्या परिसंवादां मदीं “गोवा आनी झारखंडांतले आदिवासी : स्थलांतरणाचो सोद” ह्या विशयाचेर गोंय केंद्रीत परिसंवाद आसतलो. सात हजार वर्सां आदीं झारखंडांतल्या मुंडा, असुरा, खारवा आनी हेर आदिवासी जमातींनी पयलेच खेपे गोंयांत येवन रावपाक सुरवात केली. ताचेर ह्या परिसंवादांत चर्चा जातली. आयज आमी तांकां गावडा, कुणबी, वेळीप आनी गोंयच्यो हेर जमाती म्हणून वळखतात.
ह्या परिसंवादांत गोंयचे डॉ मधु घोडकिरेकार, अॅड जुवांव फर्नांडीस आनी संदेश प्रभुदेसाय वांटो घेतले. तशेंच “ल्हान राज्यां : डॉ राममनोहर लोहियांची संकल्पना” ह्या विशयाचेर परिसंवादांत गोंयच प्रतिनिधी प्रशांत नायक हे इतिहासीक जनमत कौलांतल्यान गोंयाक वेगळें दवरपाक येसस्वी जाल्ल्या गोंय राज्याच्या फायद्यांचेर उलयतले. हाचे भायर डॉ प्रकाश पर्येंकार, रामकृष्ण जल्मी, रवींद्र वेळीप, देवीदास गांवकार, अनंत अग्नी, चेतन आचार्य, मंगलदास भट, सुदीन लोलयेंकार, शरेंद्र नायक आनी कायतान कार्वाल्हो हांचोय आस्पाव गोंयच्या प्रतिनिधींत आसा.
दोन दिसांचे परिशदे उपरांत गोंयच्या शिश्टमंडळाची खाशेली बसका डॉ. राम दयाळ मुंडा आदिवासी संशोधन संस्था आनी णव आदिवासी भाशा शिकोवपी रांची विद्यापिठाच्या आदिवासी आनी थळाव्या भास विभागांतल्या भाशातज्ञ आनी आदिवासी संशोधकां वांगडा आयोजीत केल्यात.
18 जून 1946 दिसा डॉ लोहिया हांणी गोंयांत स्वातंत्र्य संघर्शाची रणशिंग फुकलें. ताका 75 वर्सां पूर्ण जाल्ल्याच्या निमतान, 2021 वर्सा डॉ राममनोहर लोहिया फावंडेशनान गोंयांत दुसऱ्या राष्ट्रीय विचार मंथनाचें आयोजन केल्लें. तेन्ना सावन गोंयचे कार्यकर्ते ह्या फावंडेशन कडेन संबंदीत आसात. तांणी फाटल्या वर्सा गुवाहाटींत जाल्ले परिशदेंतूय वांटो घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
