भांगरभूंय | प्रतिनिधी
मुखेल न्यायाधीशाक बरयलें पत्र
लखनौ, खबरां संस्था ः युपीच्या बांदा जिल्ह्यांत नियुक्त बायल न्यायाधीशान (पिराय 31 वर्सां) इत्सामरणाची मागणी केल्या. तिणें सर्वोच्च न्यायालयाच्या मुखेल न्यायाधीशाक पत्र बरयलां. हांव दुसऱ्यांक न्याय दितां, पूण हांव स्वताच अन्यायाचे बळी जाले, अशें तिणें म्हणलां.
न्यायाधीश म्हूण न्यायाची विनवणी केली तेन्ना पुराय प्रकरण आयकून 8 सेकंदां भितर प्रकरणा कडेन दुर्लक्ष केलें. लोकांक न्याय दिवपाचो विचार करून हांव नागरी सेवेंत भरती जालें. पूण म्हजेर अन्याय जाता. आतां म्हजे कडेन आत्महत्ये बगर दुसरो पर्याय ना. देखून म्हाका मरपाची परवानगी दिवची. कृपा करून म्हजें जिवीत म्हाका सन्मानान सोंपपाक परवानगी दिवची. म्हज्या नशिबाक कोणूच जापसालदार ना, अशें तिणें पत्रांत म्हणलां.
बायल न्यायाधीशांच्या म्हणण्या प्रमाण, 7 ऑक्टोबर 2022 दिसा बाराबंकी जिल्लो बार असोसिएशनान न्यायालयीन कार्यवाहीचेर बहिश्कार घालपाचो थाराव मंजूर केल्लो. त्याच दिसा सकाळीं साडे धा वरांचेर हांव कोर्टांत काम करताले. मजगतीं, बार असोसिएशनाचे सरचिटणीस आनी वरिश्ठ उपाध्यक्ष जायते वकिल सयत न्यायालयाच्या रुमांत भितर सरले. म्हजे कडेन गैरवागणूक करपाक लागले. ह्या वेळार तांणी गाळी संवल्यो आनी कुडींतली वीज बंद केल्ली. वकिलांक जबरदस्तीन भायर काडले. हाचे उपरांत ताणें म्हाका धमकायलें. हांवेन हे विशीं कागाळ केली, पूण सुनावणी जाली ना. पूण हे घडणुके संबंदी बार असोसिएशनान कामाचेर बहिश्कार घाल्लो.
पूण पुराय कोर्टात म्हजो अपमान आनी म्हजेर शारिरीक अत्याचार जालो हे खरें. हे कागाळी उपरांत उच्च न्यायालयानय ताची दखल घेतली ना. आतां मरणा बगर म्हजे कडेन पर्याय ना. देखून म्हाका इत्सामरणाची परवानगी दिवची अशें न्यायाधीशान पत्रांत बरयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
