भांगरभूंय | प्रतिनिधी
नवी दिल्ली, खबरां संस्था : भाजपान अंदूंच्या वर्साचे सुरवेक जाल्ली कर्नाटक विधानसभा वेंचणूक झुजपा खातीर 196.7 कोटी रुपया खर्च केले, जे काँग्रेसीच्या 136.90 कोटी रुपया खर्चा परस 43 टक्के चड आसात, अशें वेंचणूक आयोगाक सादर केल्ल्या पक्षांच्या खर्च अहवालांतल्यान दिसून आयलां.
वट्ट 196.70 कोटी रुपया खर्चांतले भाजपान 149.36 कोटी रुपया पक्षाच्या प्रचाराचेर आनी 47.33 कोटी रुपया उमेदवारांचेर खर्च म्हूण जाहीर केल्यात. ह्या पक्षान जायरातीं खातीर चड खर्च केलो — प्रिंट, इलॅक्ट्रॉनीक, बल्क मॅसेज, वेबसायटी आनी टीव्ही चॅनल- 78.10 कोटी रुपया. वेंचणूक आयोगान उजवाडायल्ल्या अहवालांत टीव्ही चॅनल, दिसाळीं, फेसबूक, गूगल आनी व्हॉट्सअॅपाक जायरातीं खातीर केल्ल्या फारीकणीचोय तपशील दिला.
भाजपाच्या कर्नाटक राज्य विभागान स्टार प्रचारक आनी हेर फुडाऱ्यांचेर प्रवास खर्च 37.64 कोटी रुपया जाल्यार केंद्रीय कार्यालयान फुडाऱ्यांच्या प्रवासाचेर 8.05 कोटी रुपया खर्च केला. तशेंच पक्षाच्या मुखेल कार्यालयान 29 मार्च ते 15 मे मेरेन “सर्वेक्षण” करपा खातीर 5.90 लाख रुपया खर्च केल्ले. कर्नाटकांत 10 मे दिसा मतदान जालें आनी 13 मे दिसा मतां मेजली.
उमेदवारांचेर खर्च केल्ल्या रक्कमेंतली भोवसंख्य (34 कोटी रुपया) रक्कम एकदांच (लमसम) फारीकणीच्या रुपांत उमेदवारांक दिल्या. तशेंच उमेदवारांच्या गुन्यांवकारी फाटभुंयेचे प्रसिध्दी खातीर पक्षान 2.93 कोटी रुपया खर्च केलो.
राज्य वेंचणुकेंत जैतिवंत जाल्ल्या काँग्रेस पक्षान सप्टेंबरांत ईसीन उजवाडायल्ल्या खर्च अहवाला प्रमाण वट्ट 136.90 कोटी रुपया – पक्षाच्या प्रचाराचेर 79.44 कोटी रुपया आनी उमेदवारांचेर 45.6 कोटी रुपया खर्च केल्यात.
2018 वर्सा कर्नाटक विधानसभा वेंचणुकेच्या प्रचारांत भाजपान 122.68 कोटी, जाल्यार काँग्रेसीन 34.48 कोटी खर्च केल्ले. भाजपान 2018 वर्साच्या तुळेंत हे खेपे 60% चड खर्च केलो; काँग्रेसीचो खर्च पांच वर्सां आदींच्या तुळेंत सुमार 300% वाडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
