भांगरभूंय | प्रतिनिधी
नवी दिल्ली, खबरां संस्था: आपत्ती वेळार नागरिकांक सावधान करपा खातीर एकत्रीत शिटकावणी पद्दत तयार केल्या अशी म्हायती मुखार आयल्या. देशांत आपत्ती आयल्यार नागरिकांक मोबायलाचेर मेसेज येतात. केन्ना केन्नाय दुबाव उप्रासता. अशे तरेन धाडिल्ले आपत्कालीन संदेश व्यक्तीचे सदचे जिणेंत आडमेळीं निर्माण करतात? असो प्रस्न खासदार रामदास तडस हांणी लोकसभेंत मांडलो. तशेंच मोबायल संबंदीत शिटकावणी सेवा आसात काय ना असो उपप्रस्न आशिल्लो.
ह्या प्रस्नाची जाप दितना केंद्रीय दूरसंचार राज्यमंत्री डॉ. देवूसिंह चव्हाण हांणी, आपत्ती वेवस्थापनांत दूरसंचार तंत्रज्ञान म्हत्वाचें. गृह आनी संचारण मंत्रालयान वांगडाच येवपी आपत्ती विशीं म्हायती दिवपा खातीर मॅसेजी वरवीं शिटकावणी दिवपाक सुरू केलां. हे पद्दतीचो वापर करून नागरिकांक सावधान करपाची संदेश सेवा उपेग थारता. ऑगस्ट २०२१ सावन ही पद्दत सगळ्या राज्यांनी तशेंच केंद्रीय प्रदेशांनी कार्यरत आसा, अशें तांणी सांगलें.
आतां मेरेन वट्ट १ हजार ३५९ कोटी एसएमएस धाडल्यात. आपत्ती विशीं जागृताय आनीक वाडोवपा खातीर दोनूय मंत्रालयांनी सहकार्य केलां. ही पद्दत देशी पद्दतीन तयार केल्ली आसून तिची पुराय चांचणी करून ती कार्यरत केल्या. ही पद्दत म्हायतीचो प्रसार सुनिश्चीत करपा खातीर तशेंच कोणाच्याच जिवाचें लुकसाण जावचें न्हय हे खातीर तयार केल्ली. हे वेवस्थे कडल्यान सामान्य नागरिकांक कसलोच धोको ना, अशें केंद्रीय मंत्र्यान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
