योग्य वेळार न्हिदप भलायके खातीर फायदेशीर

भांगरभूंय | प्रतिनिधी

बरी न्हीद आनी योग्य वेळार न्हिदप आनी उठप भलायके खातीर फायदेशीर आसता. पूण चड न्हीदप कुडीक हानिकारक आसता. दोतोरांच्या म्हणण्या प्रमाण बरे भलायके खातीर णव वरां न्हीद पुरो. पूण दर दिसा हाचे परस चड न्हीद घेतल्यार जायत्यो शारिरीक समस्या निर्माण जावंक शकतात. दिसाक 14 वरां परस चड न्हीद घेतल्यार काळजाचो आघात जावपाचो धोको वाडटा अशें जायत्या अभ्यासांतल्यान दिसून आयलां.
दनपारां 90 मिनटां परस चड न्हीद घेवपी लोकांक स्ट्रोक जावपाचो धोको 25 टक्क्यांनी वाडटा, कारण चड न्हीद घेतल्यार कोलेस्टेरॉलाची पातळी इबाडपाक शकता अशें अमेरिकन अॅकॅडमी ऑफ न्यूरोलॉजीच्या मेडिकल जर्नलान केल्ल्या अभ्यासांत दिसून आयलां. तशेंच हेर जायते प्रकारचे शारिरीक समस्याय जावंक शकता. चड न्हिदेक लागून जावपी समस्यां विशीं अजूनय खूब संशोधन चालू आसा.
चड न्हीद घेतल्यार स्ट्रोक जावपाचो धोको वाडटा हांचेर अभ्यास केलो. तातूंत सुमार 62 वर्सां पिरायेच्या 31,750 लोकांचो आस्पाव आशिल्लो. अभ्यासाचे सुरवेक तातूंतल्या खंयच्याच मनशाक काळजाक वा स्ट्रोक संबंदीत समस्या नाशिल्ली. सुमार स वर्सां ह्या लोकांचेर नदर दवरली. उपरांत चड न्हीदिल्ल्यान 1557 जाणांक स्ट्रोक जाल्ल्याचें दिसून आयलें. तशेंच लोकांकडल्यान तांची न्हिद आनी न्हिदेची संवय विशीं म्हायती घेतली. तेन्ना चड न्हीद घेवपी लोकांक स्ट्रोक जावपाचो धोको 85 टक्के चड आसता अशें संशोधनांतल्यान दिसून आयलें.
दरेकल्यान आपल्या पिराये प्रमाण फावो ती न्हीद घेवपाक जाय.

पिराये प्रमाण कितली न्हीद घेवप गरजेचें ते पळोवया ः

0 ते तीन म्हयन्यांच्या भुरग्यांक न्हिदेचीं योग्य वरां : 15 – 17 वरां
4 ते 11 म्हयन्यांच्या भुरग्यांक न्हिदेचो वेळ : 12 -15 वरां
1 ते 2 वर्सां पिरायेच्या भुरग्यां खातीर न्हिदेचो वेळ : 11-14 वरां
3 ते 5 वर्सां पिरायेच्या भुरग्यांक न्हीद घेवपाचो योग्य वेळ : 13 वरां
6 ते 13 वर्सां पिरायेच्या भुरग्यां खातीर न्हीदेचो योग्य वेळ : 9 – 11 वरां
14 ते 17 वर्सां पिरायेच्या भुरग्यांक न्हिदेचो योग्य वेळ : 7 – 9 वरां
18 ते 25 वर्सां पिरायेच्या प्रौढांक न्हिदेचीं योग्य वरां : 7 – 9 वरां
26 ते 64 वर्सां पिरायेच्या लोकांक न्हिदेचो योग्य वेळ : 7 – 9 वरां

बरी न्हीद घेवपा खातीर टिप्स….

1. सगळ्यांत पयलीं तुमचें न्हिदेचें वेळापत्रक थारावचें. चड बेगीनय न्हिदप ना आनी रातीं चड उसरां न्हिदप ना.
2. योग्य वेळार न्हीदप गरजेचें. न्हिद घेतना योग्य वातावरण मेळोवप तितलेंच म्हत्वाचें.
3. तुमी सदांच शांतपणान न्हिदपाचो यत्न करचो.
4. न्हिदतना मोबायल वा टीव्ही सारकिल्लीं सगळीं इलॅक्ट्रॉनीक उपकरणां टाळचीं.
5. न्हिदपाक गेल्या उपरांत रोखडीच न्हीद येना जाल्यार न्हिदेच्या आदीं पुस्तक वाचपाची संवय करात.
6. रातची बरी आनी सुस्त न्हीद घेवपा खातीर दिसांची न्हीद घेवची न्हय.