भांगरभूंय | प्रतिनिधी
नवी दिल्ली, खबरां संस्था: संसदेंत दोग तरणाट्यांनी बरोच गोंदळ घाल्लो. ह्या प्रकरणा उपरांत लोकसभेंतले सुरक्षेचेर प्रस्नचिन्ह निर्माण जाल्लें. आयज हे घडणुके विशीं आनीक एक खबर मुखार आयल्या. हे घडणुकेचे चवकशे उपरांत आयज लोकसभा सचिवालयान ८ कर्मचार्यांक निलंबीत केल्यात.
मजगतीं, बुधवारा दोग तरणाट्यांनी अचकीत प्रेक्षक गॅलरींतल्यान सकयल उडी मारिल्ल्यान सभाघरांत खवदळ जालो. तांणी घोशणा दित कांय नळकांड्यो फोडल्यो. तातूंतल्यान हळडुवो धुंवर येवपाक लागलो. ताका लागून कांय खासदार सुरक्षीत जाग्याचेर गेले. हे तरणाटे (एकल्याचें नांव सागर) बाकड्यां वयल्यान उडयो मारीत सभापतीचे दिशेन वचपाक लागले. तांकां कॉंग्रेसीचे खासदार गुरजीतसिंग औजला हांणी धरले. मागीर हेर खासदारांनी तरणाट्यांक बडोवन सुरक्षा रक्षकांच्या ताब्यांत दिले.
संसदेंत गोंदळ घालपी दोग जाण आनी संसदे भायर घोशणा दिवपी दोग (एके बायले सयत) अशे मेळून चार जाणां सध्या पुलिशेचे तावडेंत आसा. हीं चवगूय जाणां एकठांय आशिल्लीं कांय वेगळीं ताचो सोद पुलीस घेतात. संसदेंत बोवाळ घालपी दोग तरणाट्यांनीं नांवां सागर शर्मा आनी डी. मनोरंजन (३५) अशीं आसात. जाल्यार भायर बोवाळ करतल्यांचीं नांवां नीलम (४२, हिस्सार- हरियाणा) आनी अनमोल शिंदे (२४, लातूर- महाराष्ट्र) अशीं नांवां आसात. हांकां भारतमाता की जय, तानाशाही नही चलेगी.. अश्यो घोशणा दित नळकाडयां वरवीं गॅसाची फवारणी केल्ल्यान धरल्यांत.
हे घडणुके उपरांत संसदेचे सुरक्षे विशीं प्रस्न निर्माण जाल्लो. हे घडणुकेचे फाटभूंंयेर आयज लोकसभा सचिवालयान ८ कर्मचार्यांक निलंबीत केल्यात. अरवींद, विरदास, गणेश, अनिल, प्रदीप, विमित, नरेंद्र अशीं ह्या कर्मचार्यांचीं नांवां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
