भांगरभूंय | प्रतिनिधी
विद्यार्थ्यांचो सक्रिय सहभाग सुनिश्चीत करपा खातीर गोंय म्हायती खातें राज्य सरकाराच्या कल्याणकारी येवजण्यांचेर आनी हेर संबंदीत विशयांचेर प्रस्नमाची सर्ती घडोवन हाडपाचेर लक्ष केंद्रीत करता, जाचे खातीर खात्याक व्हड प्रतिसाद मेळपाक लागला.
वेंचणुकेच्या वेळार व्हड प्रमाणांत मतदान जाल्यार लोकशाय वेवस्थेंत मतदारांक आपलो मताधिकार वापरपाच्या हक्काची चड जाणविकाय आसा, हें स्पश्ट जाता. तेच बरोबर लोकशाय देशांत खोलायेन रुजल्या अशें दिसता आनी अशे तरेन लोकशाय आनी राष्ट्रनिर्माणाचो मार्ग चड प्रखरपणान मेकळो जाता.
जे लोक आपले प्रतिनिध वेंचून काडटात, ते पंचायत वांगडी, नगरसेवक, जिल्हो पंचायत वांगडी, आमदार आनी खासदार हांचे कडल्यान आपल्यो आकांक्षा पुराय जावच्यो, उदरनिर्वाहाचें काम जावचें इशी इत्सा दवरून आसतात. हें मतींत घेवन खंयचेंय सरकार पदभार घेतले उपरांत, भौसाचो विस्वास जिखपा खातीर बरें, पारदर्शक आनी प्रभावी शासन दिवपाचो सतत यत्न करतात. हो उद्देश साध्य करपा खातीर सत्ताधारी यंत्रणा प्रिंट, इलॅक्ट्रॉनीक आनी सोशल मिडिया हँडल सारकिल्या वेगवेगळ्या संवाद पद्दतींचो चडांत चड वापर करता.
लोकप्रतिनिधी कडल्यान लोकांच्यो गरजो आनी अपेक्षा पुराय करपा बाबत, खास करून लोकांक मुळाव्यो सुविधा दिवपाक आनी आपापल्या वाठाराची एकंदर उदरगत साध्य करपाक सरकाराच्या कार्यक्षमतेचो न्याय हो दुबाव विरयत लोकच करतात.
फकत योजना आखून उद्देश साध्य जावचो ना. ह्या कल्याणकारी येवजण्यांची प्रभावी अंमलबजावणी सुनिश्चीत करप चड म्हत्वाचें, जाका लागून ह्या येवजण्यांचो फायदो गरजेवंत आनी फावो त्या लोकां मेरेन पावतलो. हें मतींत दवरून, म्हायती प्रसारीत करपा खातीर राज्य सरकाराची नोडल एजन्सी आशिल्लें म्हायती आनी प्रसिद्धी खातें सगळ्या माध्यमांतल्यान सरकाराच्या कल्याणकारी उपाय आनी कार्यावळीं विशीं भौसा मदीं चड जागृताय निर्माण करपा खातीर खरपणान वावुरता. होर्डिंग, बॅनर, पोस्टर, पोल ब्रँडींग, सर्कल ब्रँडींग, मोबायल एलईडी व्हॅन, मुखेल सुवातींनी फोटो प्रदर्शनां सयत आवटडोर प्रसिद्धीचो व्हड प्रमाणांत वापर करपाचेर खात्यान भर दिला. उदरगत आनी कल्याणकारी येवजण्यो चालीक लावपाचे दिकेन सरकारान घेतिल्ले असंख्य उपक्रम मुखार हे वरवीं खऱ्या अर्थान दाखोवपाक लागल्यात.
सुमार साडे चार दशकां आदीं पर्यटन खात्या कडल्यान म्हायती आनी प्रसिद्धी खातें वेगळें जालें तेन्ना सावन कल्याणकारी येवजण्यांक चालना दिवपा खातीर पारंपारीक माध्यमांचो चड वापर करप तशेंच रस्त्यार विद्यार्थ्यां सयत पथनाट्य, नाटक सादरीकरण आनी हेर सांस्कृतीक कार्यावळ करपाचर भर दिला.
हेर सगळ्या सरकारी खात्यां, म्हामंडळां आनी स्वायत्त संस्थां मदीं म्हायती आनी प्रसिद्धी विभाग हो राज्य सरकाराचो एक सगल्यांत म्हत्वाचो विभाग. हालींच्या वर्सांनी, सरकारान चालीक लायिल्ल्या वेगवेगळ्या येवजण्यां विशीं जागृताय पातळावपा सयत समाजीक- अर्थीक उदरगत साध्य करपाचो आनी जिणेचो दर्जो सुदारपाचो हेतू आशिल्ल्या यत्नांक पूरक म्हूण, उदरगत प्रक्रियेंत विद्यार्थ्यांचो सक्रीय सहभागा खातीर खातें यत्न करता.
विद्यार्थ्यांचो सक्रिय सहभाग सुनिश्चीत करपा खातीर गोंय म्हायती खातें राज्य सरकाराच्या कल्याणकारी येवजण्यांचेर आनी हेर संबंदीत विशयांचेर प्रस्नमाची सर्ती घडोवन हाडपाचेर लक्ष केंद्रीत करता, जाचे खातीर खात्याक व्हड प्रतिसाद मेळपाक लागला. फाटल्या कांय वर्सां सावन हें खातें हे अभिनव कल्पनेचेर लक्ष केंद्रीत करता. लोकांच्या कल्याणा खातीर सरकारान सुरू केल्ल्या उपायांचेर लोकांक संवेदनशील करपा खातीर खात्यान ही मोहीम हातांत घेतल्या.
हाचे भायर खात्यान वेळावेळार हातांत घेतिल्ल्या हेर म्हत्वाच्या कार्यावळींनी, भौशीक संपर्क अधिकारी आनी भौशीक म्हायती अधिकाऱ्यां खातीर तांची भुमिका आनी जापसालदारक्यो मोलावपाक आनी आरटीआय कायद्याची प्रभावी अंमलबजावणी करपाक कार्यशाळेचें आयोजन करपाचो आस्पाव जाता.
कॉलेजींतल्या आनी हायस्कुलांतल्या विद्यार्थ्यां खातीर क्विझ सर्त घडोवन हाडप हें खात्याचें म्हत्वाचें पावल. विद्यार्थ्यांनी दिल्ल्या विशयाचेर मोलादीक गिन्यान मेळोवप, मनशाच्या यत्नांच्या वेगवेगळ्या आंगां विशीं म्हायती पातळावप आनी सरकारी कल्याणकारी येवजण्यांची सातत्यान प्रभावी अंमलबजावणी करप अशे दोट्टी उद्दिश्ट ही सर्त पुराय करता.
प्रकाश एस. नायक
म्हायती अधिकारी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
