भांगरभूंय | प्रतिनिधी
लखनौ, खबरां संस्था : उत्तर प्रदेशांतल्या थळाव्या न्यायालयान दुधी- सोनभद्रचो भाजपा आमदार रामदुलार गोंड हाका नेण्टे चलयेचेर बलात्कार करपाच्या प्रकरणांत गुन्यांवकार थारायला. हो गुन्यांव २०१४ वर्सा जाल्लो. न्यायालयान आमदाराक दोशी थारायले उपरांत पुलिसांनी ताका अटक केली. आतां १५ डिसेंबराक न्यायालय गोंडाक ख्यास्त दितले.
मजगतीं, चलयेच्या बापायन आमदारा आड म्योरपूर पुलीस स्टेशनांत कागाळ केल्ली. २०२२ वर्सा रामदुलार गोंड आमदार म्हणून वेंचून आयले उपरांत तांणी खासदार/ आमदार न्यायालयांत केश वर्ग करपाची मागणी केल्ली. खासदार/ आमदार न्यायालयाच्या अतिरिक्त जिल्लो न्यायाधीश एहसान उल्लाह खान हांणी ह्या प्रकरणांत आमदार रामदुलाराक दोशी थारायलो. ह्या प्रकरणांत अल्पवयीन चलयेची बाजू विशेश सरकारी वकील सत्यप्रकाश त्रिपाठी हांणी मांडिल्ली.
पिडेस्ताच्या भावाचे कागाळीचेर मोयपूर पुलिसांनी आमदारा आड केस नोंद केल्ली. तिच्या भावान दिल्ले म्हायती दिल्ले प्रमाण, ४ नोव्हेंबर २०१४ दिसा सांजवेळा सात वरांचेर ताची भयण रडत घरा आयली. तिका कारण विचारलें तेन्ना तिणें गोंडान अत्त्याचार केलो, अशें सांगलें. केस नोंद जाली. तेन्ना आमदाराची बायल सरपंच म्हणून काम करताली.
पोक्सो कोर्टांत हे केसीची सुनावणी सुरू आसतना रामदुलार गोंड आमदार नाशिल्लो. पूण मागीर जाल्ल्ले वेंचणुकेंत तो आमदार म्हणून वेंचून आयलो आनी उपरांत ही केस खासदार/ आमदार विशेश न्यायालयांत हस्तांतरीत जाली. आतां न्यायालयीन सुनावणी पुराय जाल्या. १५ डिसेंबराक निवाडो दितले. दाखल केल्ल्या गुन्यांवाच्या प्रकारा प्रमाण गोंडाक २० वर्सां बंदखणीची ख्यास्त जावंक शकता. २०१२ वर्सा पोक्सो कायदो चालीक लायलो. अल्पवयीन भुरग्यांची राखण करपा खातीर ह्या कायद्यांत खर तरतूद केल्या. तशेंच २०१९ वर्सा ह्या कायद्यांत दुरुस्ती करून कांय प्रकरणांनी आरोपीक मरणाची ख्यास्त दिवपाची तरतूद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
