भांगरभूंय | प्रतिनिधी
मुंबय, खबरां संस्था ः बॉलिवूडांत नेपोटिझमाचेर खूब उलोवप जाता. कलाकाराचो पूत वा धूव आपल्या आवय- बापायच्या पावलांचेर पावल दवरून इंडस्ट्रीत प्रवेश करता. हेर कलाकारां इतली प्रतिभा तांचे कडेन नासली तरी तांकां फकत ‘स्टार किड्स’ आशिल्ल्यान संद मेळटा, असोय आरोप कांय जाण करतात. बॉलिवूडांत भोवतेक सगल्या कलाकारांच्या भुरग्यांनी अभिनयाच्या मळार करियर केला, कांय जाणांक येस लेगीत मेळ्ळां. पूण सगळ्यांत गिरेस्त ‘स्टार किड’ बॉलिवूडांत न्हय तर दक्षीण सिनेमांत आसा. गिरेस्तकायेत ताणें बॉलिवूड ‘स्टार किड्सांक’ फाटीं घाल्यात.
मेगास्टार चिरंजीवींचो पूत राम चरण हो भारताचो सगळ्यांत गिरेस्त ‘स्टार किड’. प्रसार माध्यमांच्या खबरां प्रमाण, राम चरणाची वट्ट संपत्ती सुमार 1350 कोटी रुपया आसा. अभिनया वांगडाच राम चरणाची एक प्रॉडक्शन कंपनी आसा. ताणें जायत्या वेवसायांनी गुंतवणूक केल्या. ताचो बापूय म्हळ्यार चिरंजीवीची संपत्ती सुमार 1650 कोटी रुपया आसा. राम चरणा कडेन खाजगी जेट आनी परदेशांतल्यान आयात केल्ल्यो अर्द डझन लक्झरी गाडयो आसात.
एका इंग्लीश वेब सायटीचे खबरे प्रमाण आनीक जायते कलाकार आसात, तांची गिरेस्तकाय राम चरणा इतली ना, पूण ते कोट्यधीश आसात. तातूंत व्हड प्रमाणांत बॉलिवूड कलाकार आसात. हे वळेरेंत 750 कोटी रुपया संपत्ती सयत ऋतिक रोशन दुसरे सुवातेर आसा. आलिया भट्ट 520 कोटी संपत्ती सयत तिसऱ्या क्रमांकाचेर. उपरांत करीना कपूर 485 कोटी, ज्युनियर एनटीआर 450 कोटी, आलियाचो घोव रणबीर कपूर 365 कोटी, ताचे उपरांत अभिषेक बच्चन 170 कोटी आनी प्रभास 240 कोटी हांचो आस्पाव आसा.
श्रद्धा शक्ती कपूर, सनी- बाॅबी देवल, सारा अली खान, जान्हवी कपूर, सोनम कपूर हीं पसून स्टार किडस्. आतां सनी, बाॅबी हांचीं भुरगीं सिनेमांत आयल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
