भांगरभूंय | प्रतिनिधी
93% किशोरवयीन भुरगीं युट्युब वापरतात, दिसाक 9 वरां इंटरनेटाचेर
वॉशिंग्टन, खबरां संस्था ः सोशल मिडियाचो तरणाट्यांच्या मानसीक भलायकेचेर जावपी वायट परिणामांचो हुस्को वाडत आसा. अशें आसून लेगीत किशोरवयीन भुरगीं सगळ्या मुखेल प्लॅटफॉर्मांचो व्हड प्रमाणांत वापर करतात. प्यू रिसर्च सेंटरान 13 ते 17 वर्सां पिरायेच्या 1,453 किशोरवयीन भुरग्यांच्या केल्ल्या अभ्यासांत 93% किशोरवयीन भुरगी युट्युब वापरतात अशें दिसून आयलां. ते भायर 63% किशोरवयीन भुरगीं टिकटॉक, 60% स्नॅपचॅट आनी 59% इंस्टाग्राम वापरतात. सगळ्यांत व्हडलो उणाव फेसबूक प्लॅटफॉर्मांत जाला. फेसबूकाचो वापर 2014-15 वर्सा 71% आशिल्लो तो अंदूं 33% जाला. चले परस चलयो टिकटोक आनी स्नॅपचॅटाचेर चड सक्रीय आसतात. युट्युब, इंस्टाग्राम आनी फेसबूक चले आनी चलयो सारकेच वापरतात.
13 ते 14 वर्सां पिरायेच्या भुरग्यां परस 15 ते 17 वर्सां पिरायेच्या भुरग्यांनी जायते प्लॅटफॉर्म वापरपाची चड शक्यताय आसता. ह्या पांच प्लॅटफॉर्मांतल्या एका प्लॅटफॉर्माचेर एक तृतीयांश किशोरवयीन सातत्यान सक्रीय आसतात. तशेंच किशोरवयीन भुरगीं सोशल मिडियाचो वापर करिनासतना कितलो वेळ ऑनलायन आसतात हेंय पळयलें. तांतूत अर्द्या किशोरवयीनांनी सांगलें की ते दिसाक 9 वरां इंटरनॅट वापरतात. 2014-15 वर्साच्या अभ्यासा परस हें दुपेट आसा. डिजिटल उपकरणांतय वाड जाल्या. 95% किशोरवयीन भुरगीं स्मार्टफोन वापरतात, 90% लॅपटॉप वा संगणक वापरतात, 83% गेमींग कन्सोल वापरतात आनी 65% टॅबलेट वापरतात.
सोशल मिडियाचो चड वापर केल्यार किशोरवयीन भुरग्यांक मानसीक समस्या निर्माण जावंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
