भांगरभूंय | प्रतिनिधी
शिरगांव, फातर्पेंची जात्रा, पोरणें गोंयचें फेस्त, जांबावली गुलाल…. गोंयचे संस्कृतायेचें आंग जालां, तेच प्रमाण बाणस्तारी बाजार, म्हापशें बाजार, पणजेच्या फेस्ताची फेरी… हांकांय गोंयकारांच्या भावविश्वांत म्हत्वाचें स्थान आसा. तांचे विशीं चुकीचें कितें आयकलें काय बऱ्याच जाणांक तें रुचना, पचना. हालींच म्हापशेंच्या बाजाराक ‘चोर बाजार’ अशें नांव दिवपाचो प्रकार जालो. पुर्तुगेझ तेंपा सावन हांगां वेपार करप्यांचो हो अपमान. कळंगूटच्या अशोक भाटी (22) ह्या तरणाट्यान म्हापशें बाजाराक नांव दवरपी व्हिडिओ युट्यूबाचेर घालो आनी प्रकरण तापलें. दिल्लींतल्या चोरबाजाराचो व्हिडिओ पळोवन आपूण नकळटां हें केल्ल्याचें भाटी हाणें सांगलें. मागीर वेपारी, पुलीस आनी सगल्यांची माफीय मागली. ताका शिटकावणी दिवन सोडला. आतां दिल्लींत ‘चोर’ बाजार भरता, अशें म्हणलें म्हूण दिल्लीकार चाळवनात जाल्यार पुरो!
व्हिडिओ व्हायरल जाला, ताचेर खर कमेंट आयल्यात हें कळना फुडें ताणें सोशल मिडिया वयल्यान तो डिलीट केलो. वेपारी संघटणेची तुस्त करपाक जाय, कारण ते चड आक्रमक जावंक नात. कायदो हातांत घेवंक ना. कारण हालींच्या तेंपार लोक रोखडेच आक्रमक जातात. आतां हें प्रकरण मिटलां. पूण, फुडाराक सोशल मिडिया वापरप्यांनी जतनाय घेवपाक जाय. कारण, वापरप्यांच्या हातांतल्यान नकळटां पसून चुकीचें उतर गेल्यार समाजांत तेढ निर्माण जावंक शकता. आमच्यो भारतीयांच्याे भावना खूब पातळ हें खबर आसूनय आमचेच काय भाव दुसऱ्यांचीं मनां दुखयतात… आनी ताका लागून समाज खोदूळ जाता. ताचें लुकसाण समाजाकूच जाता. प्रत्येकान स्वताचो अभ्यास करून आपणाक कितें आवडना, कसले गजालीची तिडक येता तें जाणून घेवंक जाय. ह्या सभावाचेर जैत जोडपाचो यत्न करूंक जाय. हार उडटा म्हूण गांयडोळान उडप समा न्हय. एकल्यान गाय मारली म्हूण आपणें वासरू मारप चुकीचें. (हें वाक्य फक्त ओंपार म्हणून घेवचें.), सुक्या वांगडा ओलेंय जळटा, हेंवूय मतींत दवरचें.
हालीं सोशल मिडियाचेर मनाक येता तें अपलोड जाता. घरांतल्यो खाजगी गजाली, सुवाळे सगलें- सगलें आमकां घरांत बसून पळोवपाक मेळटात. भोवती भागिरथ जावपाची गरज ना. कितें चवकशी करपाची आसा, थोमणो मारपाचो आसा, जाल्यार सकयल कमेंट बाॅक्साची तजवीज केल्या. भंय दिसता जाल्यार टोपण नांव घेवन आपूण कितलो उपद्रवी तें दाखोवं येता…. आनी बरेच जाण तें दाखयतात. कमेंट वाचल्यार ते कळटा. सोशल मिडिया वयले व्हिडिओ पळोवप काय नात, तें आमच्या हातांत आसता, अशें कांय जाण म्हणटात. मात आमच्या देशांत खंयच्या व्हिडिओक चड लायक, रीच मेळत तें सांगपाक जायना. हरकत ना. पूण, समाजघातक, दुसऱ्यांचेर टिका करपी व्हिडिओ कोणेंच घालपाक जायनात. दुसऱ्यांनी घाल्ल्या व्हिडिओचेर पातळी सोडून टिका करूंक जायना. खास करून राजकी व्हिडिओ दिसलो काय थोड्यांक नेट येता. म्हापशें बाजारा विशीं घालो, तसले वादग्रस्त उलोवप आशिल्ले व्हिडिओ करप चुकीचें. पुरावे आसात जाल्यार पुलिसांक सांगचें वा सभ्य भाशेंत ताचो व्हिडिओ करचो.
सायबर पुलीस सोशल मिडियाचेर आसात. तांणी कागाळ येयसर वाट पळोवपाक जायना. जाचेर टिका जाल्या तो कागाळ करचे पयलीं तांकां कारवाय करपाचो अधिकार ना? सोशल मिडिया अॅपाचे कंपनीक कळयल्यार ते सोमतीच कारवाय करतात. पुलिसांनी खरें म्हणल्यार सद्दां सोशल मिडिया धवळून संबंदीत समाजविद्वाट्या लोकांचे इंटरनॅट पत्ते मागूंक जाय. मागीर फोन करून तांकां शिटकावंक जाय. इतलेंच केल्यार पसून सोशल मिडियाचेर बुरशेपणा करपी जाग्यार येतले! कांय राजकी पक्ष, संघटणांच्या वावुरप्यांचेरूय नदर दवरपाचो वेळ आयला. वाचकांनी मुद्दाम दादागिरीची वा गाळयांची भास आशिल्लो आयडी तपासचो. तो एक तर लाॅक केल्लो आसता वा गाळी संवपाक खासा तयार केल्लो आसता. म्हणल्यार एकूय पोस्ट, इश्ट, फाॅलोव्हर नाशिल्लो. फक्त समाजांत दुस्वास पातळावपाक वा तटस्थ आशिल्ल्या नेटिझनाक भातेरी दिवपाक! हें खातें वापरून हे मनीस दुसऱ्यांक धमकायत आसतात. सायबर पुलिसांनी स्वता जावन असल्यांक मेळपाक आपोवंक जाय. फुडाऱ्याचेर टिका केली काय रोखडेच त्या मनशाक सोदून काडून अटक करतात, ते भशेन. देवाचेर, धर्माचेर टिका करप्यांचेर जशी कारवाय जाता, तशी मनशां मदीं धोंस घालपी, दुस्वास पातळावपी, ब्लॅकमेल, झुंडशाय करपी, मनस्ताप दिवपी…. पाताळयंत्री अपुरबुद्दांचेर स्वता जावन केन्ना कारवाय करतले आमचे पुलीस?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
