भांगरभूंय | प्रतिनिधी
कोची, खबरां संस्था ः केरळाचे राज्यपाल आरिफ मोहम्मद खान हांणी केरळाचे मुख्यमंत्री पिनराई विजयन हांचेर गंभीर आरोप केला. आरिफ खान हांणी विजयनान म्हाका शारिरीक इजा करपाचो कट रचला, अशें सांगलें. राज्यपालाची गाडी विमानतळार वता आसतना मार्क्सवादी कम्युनिस्ट पक्षाच्या स्टुडंट्स फेडरेशन ऑफ इंडियाच्या कार्यकर्त्यांच्या वाहनान राज्यपालाचे गाडयेक धपको दिलो. हे घडणुके उपरांत राज्यपालान केरळाच्या मुख्यमंत्र्याचेर थेट गंभीर आरोप केले. राज्यपाल दिल्लीक वचपाक तिरुवनंतपुरम आंतरराष्ट्रीय विमानतळार वतना ही घडणूक घडली.
अपघाता उपरांत राज्यपालान प्रसार माध्यमां कडेन संवाद सादलो. तांणी म्हणलें, मुख्यमंत्री विजयन हांणी म्हाका जखमी करपाक हो कट रचलां. ते खातीर तांणी आपले मनीस धाडिल्ले. कायदो आनी सुवेवस्था, संवैधानिक मुल्यां इबाडपाक लागल्यात. एका जाग्यार मुख्यमंत्र्याची कार्यावळ चलता आनी थंय आंदोलकांच्यो गाडयो आयल्यो जाल्यार पुलीस त्या गाडयांक थंय प्रवेश दितले? मुख्यमंत्र्याच्या गाडये लागसार कोणाकूय वचूंक मेळटले काय? हांगा मात पुलिसांनी तांकां तशें करपाक परवानगी दिली. तशेंच आंदोलकांची गाडी थांबयली आनी पुलिसांनीच तांकां पळून वचपाक दिलें.
राज्यपाल आरीफ खान हांणी म्हणलें, मुख्यमंत्री विजयन आनी म्हजे एका मुद्द्याचेर एकमत ना जाल्यार हाचो अर्थ असो न्हय की ह्या दिग्गज मार्क्सवादी फुडाऱ्यान म्हाका जखमी करपाचो कट रच्चो. आंदोलकांनी फकत म्हाका विरोध केलो ना वा काळे ध्वज दाखोवन ते शांत बसले नात. तांणी दोनूय वटांनी म्हजेर हल्लो केलो. ते उपरांत हांव म्हज्या गाडयेंतल्यान देंवलो. पूण ते (आंदोलक) थंयच्यान कित्याक पळून गेले? तें कळ्ळें ना. तशेंच, ते सगळे एकाच गाडयेंतल्यान आयल्यात हें पुलिसांक खबर आशिल्लें.
आरीफ खानान म्हणलें, मुख्यमंत्र्यान म्हाका जखमी करपाचो कट रचलो. तांच्या गुंडांनी तिरुवनंतपुरमाच्या रस्त्यांचेर ताबो घेतलो. खान हांच्या प्रवासांत तीन सुवातेर आंदोलकांनी तांकां काळे बावटे दाखयले जाल्यार हातूंतल्या दोन सुवातींनी तांचे गाडयेक धपको बसलो अशें राजभवनांतल्या सूत्रांनी सांगलें. एसएफआय कार्यकर्त्यांनी एकाच सुवातेर राज्यपालाचे गाडयेक काळे बावटे दाखोवन तांची गाडी आडायली अशें पुलिसांनी सांगलें. विद्यार्थी संघटनेच्या सात कार्यकर्त्यांक अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
