भांगरभूंय | प्रतिनिधी
नवी दिल्ली, खबरां संस्था : केंद्र सरकारान कांद्याचे निर्यातीचेर बंदी घाल्या उपरांत महाराष्ट्रांतले शेतकार आंदोलन करतात. महाराष्ट्रांतल्या कांद्याच्या शेतकारांनी केल्ल्या निशेधा उपरांत केंद्रान आपली भुमिका जाहीर केल्या.
केंद्र सरकार आतां शेतकारांचें हितसंबंद राखपा खातीर बफर स्टॉक वाडोवपाचें आसा आनी हे खातीर सगल्या बाजारांतल्यान सुमार दोन लाख टन कांदो विकतें घेवपाचें आसा. देखून देशी ठोक दर स्थीर उरतलें. दुसरे वटेन सरकारान सांगलां, किरकोळ बाजारांतलें दर वाडचें न्हय देखून बफर स्टॉकाचो वापर करतले.
प्रसार माध्यमांक म्हायती दितना गिरायक वेव्हार सचीव रोहित कुमार सिंग हांणी, सरकारी खरेदी चालू आशिल्ल्यान कांद्याचे निर्यात बंदीचो शेतकारांचेर कसलोच परिणाम जावचो ना. अंदूं आतां मेरेन आमी ५.१० लाख टन कांदो विकतो घेतला आनी सुमार दोन लाख टन चड खरीफ कांद्याचें पीक विकत घेतले. सरकार रबी कांद्याचो दर्जो मतींत घेवन तो विकत घेता, जो चड काळ तिगता आनी इबाडना.
बफर स्टॉक मर्यादा वाडयली
बफर स्टॉक तिगोवन दवरपा खातीर, कांद्याच्या दरांत वाड जावची न्हय हे खातीर सरकाराचो बाजारांतलो हस्तक्षेप वाडत आसा. ते वरवीं सरकार कांदो विकतें घेता. सरकारान २०२३-२४ वित्तीय वर्सा खातीर कांदो बफर स्टॉकाची मोख सात लाख टन मेरेन वाडयल्या. जाल्यार फाटल्या वर्सा प्रत्यक्ष स्टॉक फकत तीन लाख टन आशिल्लो.
गिरायक वेव्हार सचीव रोहित कुमार सिंगाच्या म्हणण्या प्रमाण बफर स्टॉका खातीर शेतकारांकडल्यान सुमार ५.१० लाख टन कांदो मेळ्ळा. वेपारी कांदो सांठोवन दवरून दर वाडयल्यार केंद्र सरकार खंयच्याय वेळार बफर स्टॉका वरवीं कांदो बाजारांत हाडूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
