रातचो अचकीत कान दुखता?
भांगरभूंय | प्रतिनिधी
रातच्या वेळार अचकीत कान दुखपाक लागता तेन्ना कानाची दूख सोंसपाक जायना. न्हीद लागना. चडशा लोकांक जोर, चिडचीड वा आयकपाक उणें येवप अशे जायते त्रास जातात. कानांतल्यान घाण उदक येता. केन्ना केन्ना सुजूय येता. रातचो अचकीत कान दुखपाक लागल्यार हे उपाय करात.
कांद्याचो वापर: कांदो तुमच्या कानाची दुख उणी करपाक मजत करता. एक कुलेर कांद्याचो रोस घेवचो. ताचे दोन ते तीन थेंब कानांत घालचे. अशें दिसांतल्यान दोन ते तीन फावटीं केल्यार कानाची दुख उणी जातली.
लसूण- कानाची दुख उणी करपाक लसूण प्रभावी आसता. हे खातीर लसूणाचे दोन कुडके घेवन ते कुसकुसचे. दोन कुलेरां सांसवाचें तेल घालून तातूंत लसणाचे कुडके शिजोवचे. तयार केल्लें तेल कांय वेळ थंड जावपाक दवरचें, उपरांत ताचे एक ते दोन थेंब कानांत घालचे. मागीर तुमच्या कानांची दुख बरी जातली.
सांसवाचें तेल: रातच्या वेळार कान दुखपाक लागल्यार सांसवाच्या तेलाचे दोन- तीन थेंबे कानांत घालून धा ते पंदरा मिनटां दवरचें. अशें केल्यार तुमचो कान दुखपाचो बंद जातलो.
पुदिना: कान दुखल्यार पुदीना वापरात. पुदीना पानांचो रोस घेवन ह्या रोसाचे एक ते दोन थेंब कानांत घालचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
