भांगरभूंय | प्रतिनिधी
बेळगांव, प्रतिनिधी ः बेळगांव शारा सावन 9 किमी अंतराचेर आशिल्ल्या होसावंतमुरी गांवांत मध्यानरातीं सुमार 1 ते 3 वरां मजगतीं घडिल्ली ही घडणूक. एकलो चलो आपले मोगिके वांगडा पळून गेलो. ह्या कारणांक लागून चलयेच्या घरच्यांनी चल्याचे आवयक मारपेट केली. फकत मारपच न्हय तर तिका विवस्त्र करुन लायटीच्या खांब्याक बांदून दवरली. ह्या प्रकरणांत पुलिसांनी सात जाणांक अटक केल्या.
एक 24 वर्सां पिरायेच्या तरणाट्याचो 18 वर्सां पिरायेचे चलये कडेन मोगाचो संबंद आशिल्लो. पूण ह्या नात्याक चलयेच्या घरच्यांचो विरोध आशिल्लो. देखून तांणी तिचें लग्न दुसऱ्या कडेन करपाचें थारायलें. ते प्रमाण सोमारा तिचो साखरपुडो जावपाचो आशिल्लो. पूण, ताचे आदीं हें जोडपें पळून गेलें, अशी म्हायती पुलिसांनी दिली.
जोडपें पळून गेले उपरांत चलयेच्या कुटुंबान चल्याचे आवयचेर दुबाव घेतलो. तिच्या घरा वचून तांणी तिचेर हल्लो केलो. तिका विवस्त्र करुन खांब्याक बांदली आनी मारपेट केलो. मजगतीं, पिडित आवयक उपचारा खातीर बेळगांव हॉस्पिटलांत दाखल केल्या. पळून गेल्ल्या जोडप्याचो सोद पुलिसांनी सुरू केला.
बेळगांव पुलीस आयुक्त एसएन सिद्धरामप्पा हांणी कर्नाटक राज्य राखीव पुलीसाचे दोन युनिट चल्याच्या घरा कडेन तैनात केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
