भांगरभूंय | प्रतिनिधी
सर्वोच्च न्यायालयान केलें स्पश्ट, राज्य दर्जो आनी वेंचणुक घेवपाचे निर्देश
नवी दिल्ली, खबरां संस्था ः जम्मू-काश्मीराक खाशेलो दर्जो दिवपी कलम 370 तात्पुरतें आसा आनी तें रद्द करपाचो केंद्र सरकारान घेतिल्लो निर्णय बरोबर आसा अशें सर्वोच्च न्यायालयान आयज स्पश्ट केलां. हे संबंदी न्यायालयान याचिकादारांच्या सगल्या हरकतींचो सविस्तर नियाळ घेतलो आनी निकाल दिलो. तशेंच राज्यांत राष्ट्रपती राजवट लागू करपा खातीर राज्य विधीमंडळाची शिफारस घेवप सक्तीचें ना अशें स्पश्ट करून न्यायालयान हरकत न्हयकारली.
ह्या प्रकरणांत सर्वोच्च न्यायालयाच्या पांच वांगड्याच्या खंडपिठान तीन निकाल दिल्यात. तांतूतलो एक निकाल स्वता मुखेल सरन्यायाधीश धनंजय चंद्रचूड, न्यायाधीश जे. गवई आनी न्यायाधीश सूर्य कांत हांणी दिला. न्यायाधीश कौलान स्वतंत्र निकाल दिलो, जाल्यार न्यायाधीश संजीव खन्ना हांणी दोनूय निर्णयांक मंजुरी दिली. ह्या प्रसंगाचेर मुखेल न्यायाधीश धनंजय चंद्रचूड हांणी ह्या तीन निवाड्यांचो सारांश वाचलो.
वेंचणूक बेगीन घेवची, राज्य दर्जोय दिवचो
मजगतीं, सर्वोच्च न्यायालयान आपल्या निकालांत वेंचणूक आयोगाक जम्मू-काश्मीरांत बेगीनांत बेगीन विधानसभा वेंचणूक घेवपाचो आदेश दिला. “जम्मू-काश्मीर विधानसभेची वेंचणूक 30 सप्टेंबर 2024 पयलीं जावंक जाय. जम्मू-काश्मीराचो राज्य दर्जो बेगीनांत बेगीन स्थापन करचो”, अशें मुखेल न्यायाधीश धनंजय चंद्रचूडान आपल्या निकालांत म्हणलां.
निर्णय इतिहासीक : मोदी
‘जम्मू-काश्मीरांत तेन्नाच्या झुजाचे स्थितीक लागून कलम 370 रद्द जालो. ही तात्पुरती वेवस्था. कागदपत्रांनीय ताचे विशीं उल्लेख केला. देखून कलम 370 रद्द करप बरोबर आशिल्लें’, अशें आयज सर्वोच्च न्यायालयान सांगलें. ह्या निकाला उपरांत भाजपा आनी केंद्रांतल्या जायत्या मंत्र्यां कडल्यान प्रतिक्रिया येवपाक लागल्या. आतां प्रधानमंत्री नरेंद्र मोदीन स्वता एक्सचेर पोस्ट करून जम्मू-काश्मीरांतल्या लोकांक आश्वासन दिलां.
कलम 370 रद्द करपा संबंदी सर्वोच्च न्यायालयान आयज दिल्लो निकाल इतिहासीक आसा अशें प्रधानमंत्री नरेंद्र मोदी हांणी सांगलें. ह्या निकालाक लागून भारतीय संसदेन 5 ऑगस्ट 2019 दिसा घेतिल्लो निर्णय घटनात्मक नदरेन वैध थारलां. जम्मू, काश्मीर आनी लडाखांतल्या नागरिकां खातीर ही आशा, प्रगती आनी एकचाराची घोशणा आसा. ह्या निर्णया वरवीं न्यायालयान एकचाराचें तत्व घटमूट केलां. ताचो भारतीय आदर करतात.
आमी तुमचीं सपनां पुराय करपाक कटिबद्ध आसात अशें जम्मू, काश्मीर आनी लडाखांतल्या लोकांक हांव आश्वासन दिवपाक सोदतां. कलम 370 रद्द जाल्ल्यान समाजांतल्या असुरक्षित आनी कुशीक काडिल्ल्या घटकांक सरकारी फायदे दिवचें आमी थारायलां अशेंय मोदी हांणी सांगलें.
आयचो निकाल फकत कायदेशीर निकाल न्हय, तो एक आशेचें किरण आसा, फुडाराचें वचन आसा आनी मजबूत, चड अखंड भारत उबारपाच्या आमच्या सामुहीक संकल्पाची गवाय आसा अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
