भांगरभूंय | प्रतिनिधी
अपघातांत पांच जाणांक मरण
चंपा, खबरां संस्था : छत्तीसगडांतल्या जांजगीर- चंपा जिल्ह्यांत ट्रकान गाडयेक धपको दिल्ल्यान लग्न करून घरा वचपी न्हवरो- व्हंकले वांगडा हेर तीग जाणांक जाग्यारूच मरण आयलें. आयतारा हो अपघात जालो. गाडयेक धपको दिवन ट्रक चालक पळून गेलो. पुलीस ताका सोदतात.
वराड लग्ना उपरांत परततना गाडयेक एका ट्रका नेटान धपको दिलो. ही गाडी रामगडच्यान अकलतराचे दिकेन वताली. गाडयेंत नवें जोडपें आशिल्लें. पकरिया रानाच्या वाठारांत ही घडणूक घडली.
पुलीस घडणुके सुवातेर पावून थंय हाजीर आशिल्ल्याचे मजतीन अपघात जाल्ली गाडी भायर काडली. जखमींक रामगड भलायकी केंद्रांत व्हेले तेन्ना डॉक्टरांनी सगळ्यांक मरण आयिल्ल्याचें सांगलें. फांतोडेर सुमार ५ वरांचेर हो अपघात घडलो. ह्या ट्रकाच्या धपक्यान गाडयेचो चुरो जालो. अपघाताचो आवाज आयकून थळावे लोक धांवून आयले. लोकांनी गाडयेंत आडकून उरिल्ल्या पांचूय जाणांक भायर काडपाचो यत्न केलो. पुलिसांक अपघाताची म्हायती दिली. उपरांत त्या सगळ्यांक भलायकी केंद्रात व्हेलीं.
बालोदा हांगाचो शुभम सोनी आनी शिवनारायण हांगाची नेहा हांचें शेनवारा रातचें लग्न जाल्लें. आयतारा शुभम आपले व्हंकलेक घेवन घरा वतना हो अपघात जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
