हात नितळ दवरप भलायके खातीर फायद्याचें
भांगरभूंय | प्रतिनिधी
नितळसाण सांबाळपा फाटलो मुखेल हेतू म्हळ्यार संसर्गाक लागून पातळिल्ल्या गंभीर दुयेंसांपसून स्वताची राखण करप. हाताची नितळसाण गॅस्ट्रोइंटेस्टाइनल संसर्ग- टायफॉयड, कॉलरा आनी हेर वेगवेगळे उदकांतल्यान जावपी दुयेंस, इन्फ्लूएंझा ए (H1N1 आणि H3N2) सारकिल्ले श्वसन संसर्ग आडावपाक मजत करता.
हात नितळ धुवप हें एक सामकें सोंपें काम. जायत्या गंभीर दुयेंसांक आळाबंदा हाडपाचो हो एक प्रभावी मार्ग. हात नितळ धुवल्यार खास करून पोटाचे आनी पचन संबंदी दुयेंस आडावपाक मजत जाता. हात धुवप हो नितळसाणेचो सगळ्यांत बरो उपाय.
जेवचे पयलीं, शौचालयां उपरांत, दुयेंत मनशाक मेळचें पयलीं आनी उपरांत आनी खोंकली आनी शिंकले उपरांत हात धुवचे. कोविड-19 म्हामारी उपरांत हाताची योग्य नितळसाण फकत जेवणा पयलीं न्हय, तर दर एका म्हत्वाच्या कामा पयलीं आनी वेगवेगळ्या वस्तूंक हात लायल्या उपरांतय म्हत्वाची हें आमकां कळ्ळां.
हात धुवपाची पद्दत…
- हाताची नितळसाण उण्यांत उणी 60 सेकंद करपाक जाय.
- हात उदकान ओले करात आनी मागीर शाबू वा हॅण्ड वॉश लावन हात धुयात.
- उपरांत निवळ रूमाल वा टॉवेलान हात पुसचे.
जंतू पातळचे न्हय म्हूण वेगवेगळ्या परिस्थितींत हात धुवप म्हत्वाचें. रांदचे पयलीं आनी उपरांत, जेवण वा पेय घेवचे पयलीं आनी उपरांत, दुयेंत मनशाच्या संपर्कांत आयल्यार, हॉस्पिटलांत भितर सरतना आनी भायर आयले उपरांत, जखमांचेर उपचार करतना वा वखदां घेतना, भौशीक येरादारी वापरतना वा इलॅक्ट्रॉनीक उपकरणांक हात लायले उपरांत आनी खोंकली वा शिंकले उपरांत हात नितळ धुवप गरजेचें.
ते भायर गॅस पंप, एटीएम आनी लिफ्टाच्या बटणांक हात लायल्या उपरांत, हेरांक हात मेळयल्या उपरांत वा वॉशरुम वापरल्या उपरांत, डायपर बदलल्या उपरांत वा निवतसाण केल्या उपरांत आनी कोयर वा पाळीव प्राण्यांक हात लायल्या उपरांत हात धुवप गरजेचें.
संसर्गजन्य दुयेंस टाळपा खातीर हाताची नितळसाण आमच्या जिवितांत खूब गरजेची. हाताची नितळसाण सगळ्यांक सुरक्षीत दवरपाक मजत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
