विकास भारत संकल्प यात्रांत 1 कोटी परस चड लोक वांटेकार
भांगरभूंय | प्रतिनिधी
उत्तर प्रदेशांत सगल्यांत चड 37 लाख लोक
नवी दिल्ली, खबरां संस्था ः प्रधानमंत्री नरेंद्र मोदी हांणी 15 नोव्हेंबराक झारखंडांतल्या खूंटी गांवा सावन सुरू केल्ली विकास भारत संकल्प यात्रा देशभरांतल्या नागरिकांच्या सहभागाक चालना दिवपी परिवर्तनकारी मोहीम थारल्या.
इलॅक्ट्रॉनिक्स आनी म्हायती तंत्रज्ञान मंत्रालयान तयार केल्ल्या कस्टमाइज्ड पोर्टला प्रमाण 7 डिसेंबर मेरेन विकास भारत संकल्प यात्रांनी वांटेकार जावपी लोकांचो आंकडो 1 कोटी परस चड जालो. आतां मेरेन 36 हजार ग्रामपंचायतीं मेरेन ही यात्रा पावल्या. उत्तर प्रदेशांत सगल्यांत चड 37 लाख लोकांनी वांटो घेतला. हाचे उपरांत महाराष्ट्रांत 12.07 लाख आनी गुजरातांत 11.58 लाख लोकांनी वांटो घेतलो. जम्मू- काश्मीरांतय हे यात्राक उमेदीन येवकार मेळ्ळो थंय आतां मेरेन 9 लाखां परस चड लोकांनी वांटो घेतला.
संकल्प यात्रांच्या पयल्या सप्तकांत पांच लाख नागरिकांनी वांटो घेतलो. फाटल्या 10 दिसांत देश भरांतल्यान 77 लाखां परस चड लोकांनी ह्या यात्रांत वांटो घेतलो. खूप थोड्याच काळात ही यात्रा शारी वाठारांतल्या 700 परस चड सुवातींनी पावला आनी वट्ट 79 लाख लोकांनी 2047 मेरेन भारताक विकसीत राष्ट्र करपाचे दिकेन यत्न करपाचें थारायलां.
अभूतपूर्व आउटरीच यत्नांत यात्रा सूचना, शिक्षण आनी संचारण (आयईसी) हाचो उपेग करुन 2.60 परस चड ग्राम पंचायती आनी 3600 परस चड शारी थळाव्या संस्थांचो आस्पाव करपाचे दिकेन वता. हांतूतल्यान लोकांनी सरकारी येवजण्यो आपल्या फायद्या खातीर वापरच्यो अशें आवाहन करतात. बायलां केंद्रीत येवजण्यां विशीं जागृताय करप हो यात्रेतलो एक केंद्रीय मुद्दो जाका लागून 46 हजारां वयर लावार्थ्यांनी पीएम उज्ज्वला येवजणे खातीर नांव नोंदणी केलां. भलायकी शिबिरां लेगीत व्हड आकर्शण थारलां आनी आतां मेरेन 22 लाख व्यक्तींची तपासणी जाल्या.
विकास भारत संकल्पयात्राचो एक भाग म्हूण शेतकारां खातीर केल्ल्या ड्रोन प्रदर्शनांक लागून खूब उमेद निर्माण जाल्या. ‘ड्रोन दीदी येवजणे खाला 15 हजार बायलां सेल्फ हेल्प गटांक ड्रोन दितले आनी दोन बायलां वांगड्यांक गरजेचें प्रशिक्षण दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
