भांगरभूंय | प्रतिनिधी
परराश्ट्र राज्यमंत्री व्ही. मुरलीधरन हांणी दिली म्हायती
नवी दिल्ली, खबरां संस्था ः सध्या भारतीय लोक कामां निमतान परदेशांत वतात तशेंच हालींच्या काळांत जायत्या भारतीय विद्यार्थ्यांक परदेशांत शिकपाक वचून पदवी मेळोवपाची इत्सा आसता. हातूंतले चडशे विद्यार्थी परदेशांत शिक्षण पुराय करून नोकरी सोदपाचोय यत्न करतात. ह्या विशींच्या एका प्रस्नाक परराश्ट्र राज्यमंत्री व्ही. मुरलीधरन हांणी राज्यसभेंत लेखी जाप दिली. तांच्या म्हणण्या प्रमाण 2018 वर्सा सावन परदेशांत गेल्ल्या 403 विद्यार्थ्यांक सैमीक कारणांक लागून, अपघाताक लागून आनी वैजकी कारणांक लागून मरण लागून मरण आयलां अशें हांतूत म्हणलां.
मंत्रालयान दिल्ल्या लेखी उत्तरांत फाटल्या पांच वर्सांची आंकडेवारी दिल्या. तातूंत सगळ्यांत चड 91 जाणांक कॅनडांत मरण आयलां. ताचे उपरांत यूके (48), रशिया (40), युनायटेड स्टेट्स (36), ऑस्ट्रेलिया (35), युक्रेन (31), जर्मनी (20), सायप्रस (14) आनी इटली आनी फिलीपीन्स मदीं दरेकीं 10 जाणांक मरण आयलें.
2018 वर्सा सावन चारशें परस चड भारतीय विद्यार्थ्यांक मरण आयिल्ल्याचो आंकडो इतलो कित्याक? असो प्रस्नूय ह्या वेळार उप्रासलो. परराश्ट्र मंत्रालयाचे प्रवक्ते अरिंदम बागची हांणी भायर त्या प्रस्नाचेर जाप दितना म्हणलें, फाटल्या कांय वर्सांत शिक्षणा खातीर परदेशांत वचपी विद्यार्थ्यांचो आंकडो कितलेशेच पटींनी वाडला, देखून हो मरणाचोय आंकडो वाडता.
भारतीय विद्यार्थी सध्या संवसारांतल्या 240 देशांनी शिकतात अशी म्हायती भारताच्या परराश्ट्र मंत्रालयान फेब्रुवारींत जाल्ले अर्थसंकल्पीय अधिवेशनांत दिल्ली. कॅनडा, ऑस्ट्रेलिया, यूके आनी अमेरिका ह्या देशांक विद्यार्थ्यांनी चड पसंती दिला. ते भायर उझबेकिस्तान, फिलीपीन्स, रशिया, आयर्लंड, किर्गिस्तान आनी कझाकस्तान ह्या देशांनीय व्हड प्रमाणांत विद्यार्थी शिक्षण घेवपाक वतात. कोरोना उपरांत शिक्षणा खातीर परदेशांत वचपाचो आंकडो वाडला अशें आंकडेवारींतल्यान दिसून येता. 2022 शिक्षणीक वर्सा उच्च शिक्षणा खातीर परदेशांत वचपी विद्यार्थ्यांचो आंकडो फाटल्या स वर्सां परस सगळ्यांत चड आसा. केंद्रीय शिक्षण मंत्रालयान संसदेंत दिल्ले आंकडेवारी प्रमाण 2022 वर्सा 7.5 लाख विद्यार्थ्यी परदेशांत गेले. यूएसएंत शिकपाक वचपी देशां मदीं भारत अंदूं चीनाच्या मुखार पावलां.
2017 वर्सा सावन परदेशांत शिकपाक वचपी विद्यार्थ्यांचो आंकडो सतत वाडत आसा. सरकारी आंकडेवारी प्रमाण 2017 वर्सा 4.5 लाख, 2018 वर्सा 5.2 लाख आनी 2019 वर्सा 5.86 लाख विद्यार्थ्यांनी परदेशांत शिकपाक वचपाचो थारायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
