लोकप्रीय बालकलाकार- ज्यु. मेहमूद

भांगरभूंय | प्रतिनिधी

तांगेलो बापूय रेल्वेत नोकरी करतालो. तांकां म्हयन्याक 320 रुपये पगार आशिल्लो. त्या वगतार ज्युनियर मेहमूदाक दर दिसाक 3000 रुपया मानधन मेळटालें! ते तेपार  मुंबय ‘एम्पाला’ हे परदेशी कंपनीची मोटारी फकत बारा आशिल्ल्यो. तातूंतली एक ज्युनियर मेहमूदाली.

कलाकार

ज्युनियर मेहमूद काल  8 डिसेंबराक संवसाराक अंतरले. तांचें खरे नाव नईम सय्यद. जल्म 15 नोव्हेंबर 1956. मुंबयंत ते जल्मले. ते णव वर्साचे आसतना तांगेलो व्हडलो  भाव हिंदी सिनेमा सृश्टीत स्टील फोटोग्राफी करतालो. घरा येतगीर ताचे कडल्यान फिल्मी किस्से आयकून नईमाकूय सिनेमांचें आकर्षण जालें. ताच्या हट्टाक लागून  भावान ताका शुटींगाच्या थळार व्हेलो. ओग्गी बसपाक सांगून भाव कामांत मग्न जालो. शुटींग पळयतना नईमाक दिसलें की, ताच्याच पिरायेचो एक भुरगो सिनेमाचो टेक करपा वेळार भाशण विसरता. ताणें त्या भुरग्याक म्हणलें, ‘तूं इतलें सादें भाशण उलोवपाक शकना?’. हें थंय फाट करून बशिल्ल्या दिग्दर्शकान आयकलें आनी नईमाक विचारलें, ‘तूं शकता उलोवपाक?’. ताचेर नईमान एकूय रिटेक दिनासतना तें उलोवन दाखयलें. त्या कामां खातीर ताका रोख पाच रुपया मेळ्ळे. ही फुडारांतले येसस्वी कार्यकिर्दीची, तांगेली पयली पायरी आसली! 

1966 चो ‘मोहब्बत जिंदगी है’ हो तांचो पयलो सिनेमां. उपरांत  67 सालांत ‘नौनीहाल’. 1968 सावन तांणी फाटल्यान वळून पळयलें ना. तांगेले सेगीत स सिनेमां बरेच गाजलें .‘’वासना, संघर्ष, सुहागरात, परिवार, फरिश्ता आनी ब्रह्मचारी’.

‘ब्रह्मचारी’ सिनेमांत तांचे सयत 11 बाल कलाकार आसले, तांतूनय तांगेली  भूमिका याद उरपा सारकी थारली. सिनेमांतले तांगेले काम पळोवन विनोदवीर मेहमूद हांणी तांकां आपलो पट्टशिष्य मानून, ज्युनियर मेहमूद हे नांव दिल्लें. 1969 सालांत तांगेले वट्ट णव सिनेमां पडद्यार झळकल्ले. ‘विश्वास’, ‘सिमला रोड’, ‘राजा साब’, ‘प्यार ही प्यार’, ‘नतीजा’, ‘चंदा और बिजली’, ‘बालक’, ‘अंजाना’, ‘दो रास्ते’. हातूंतलो ‘दो रास्ते’ सिनेमांन रूप्या सुवाळो मनयलो. 1970 त ज्युनियर मेहमूदान पाच सिनेमा केले. ‘यादगार’, ‘कटी पतंग’, ‘घर घर की कहानी ‘, ‘बचपन’, ‘आन मिलो सजना’. हातूंतलो सुपरस्टार राजेश खन्ना बरोबरचो ‘कटी पतंग’ आनी ‘आन मिलो सजना’ सिनेमांनी विक्रमी येश संपादन केल्ले. दोनूय सिनेमांतली नायिका आशा पारेख आशिल्ली. ‘आन मिलो सजना’ मदले ‘पलट मेरी जान…’ हे गीत ज्युनियर मेहमूदान आपले मिष्कील अभिनय अदाकारीन फुलयिलां.

1971 सालांत ज्युनियर मेहमूदाली पिराय पंदरा वर्साची जाल्ली. आतां तो बाल कलाकार उरुंक नाशिल्लो, तरीसूद तांगेले बारीक आंगलोटीक लागून तो धा -बारा वर्साचो कसो दिसतालो. ‘उस्ताद पेट्रो’, ‘रामू उस्ताद’, ‘लडकी पसंद है’, ‘जोहर मेहमूद इन हाँगकाँग’, ‘कारवाँ’, ‘हाथी मेरे साथी’, ‘छोटी बहू’, ‘चिंगारी’, ‘हंगामा’, ‘खोज’ आनी देव आनंदालो ‘हरे राम हरे कृष्ण’ सिनेमांतल्यान तो दिसलो. 

1972 त ताणें ‘बाॅम्बे टू गोवा’  सिनेमांत सिनियर मेहमूद बरोबर काम केलें. ह्या स वर्सांत तांणी आपले बालपण विसरुन  व्हडल्या कलाकारा प्रमाण रातदिस काम केल्लें. तांगेलो बापूय रेल्वेत नोकरी करतालो. तांकां म्हयन्याक 320 रुपये पगार आशिल्लो. त्या वगतार ज्युनियर मेहमूदाक दर दिसाक 3000 रुपया मानधन मेळटालें! ते तेपार  मुंबय ‘एम्पाला’ हे परदेशी कंपनीची मोटारी फकत बारा आशिल्ल्यो. तातूंतली एक ज्युनियर मेहमूदाली. तो एम्पाला कार घेवन शुटींग करपाक वतालो. तांणी राज कपूर सोडून देव आनंद, दिलीप कुमार, राजेंद्र कुमार, राजेश खन्ना, धर्मेंद्र, मनोजकुमार, ते काळांतले सगल्या येसस्वी हिरो वांगडा काम केला. साठ आनी सत्तरच्या दसकांतले कौटुंबिक सिनेमांत ल्हान भुरग्यांच्यो भूमिका आसताल्योच… आनी तांगेल्या तोंडांत पदां, पॅरोडीय आसताली. 

1975 पसून ज्युनियर मेहमूद आयिल्ले सिनेमां चडशे कोणाचे लक्षात नासतले  ‘रोमिओ इन सिक्कीम’, ‘आपबिती’, ‘फर्ज और प्यार’, ‘लव्हर्स’, ‘फुलवारी’, ‘करिश्मा कुदरत का’, ‘सदा सुहागन’ हे सिनेमांतल्यान , सचिन पिळगांवकरा वांगडचे ‘गीत गाता चल’ आनी ‘अखियों के झरोखोंसे’ हे सिनेमां मात कायमस्वरूपी लक्षांत उरल्यात!

ज्युनियर मेहमूदान तांचे फिल्मी कारकिर्दीत 265 सिनेमांनी काम केलां. 1985 उपरांतचे सिनेमां स्वीकारतना तांणी ‘बी ग्रेड’चे सिनेमां नाकारपाक जाय आसले. बी ग्रेड चो ‘शिक्को ‘ एकदां बसतगीर जोडिल्लें नांव घाण जावपाक वेळ लागना. नामनेच्या कलाकारांनी आपले  सिने कारकीर्दीत असली चुक केल्ली आनी तातूंतल्यान ज्युनियर मेहमूदुय सुटलो ना. 

ज्युनियर मेहमूदान स सिनेमांची निर्मणी केल्या. तातूंतले कांय सिनेमांचे दिग्दर्शनूय केलां. ते मदले दोन पंजाबी, एक आसामी आनी तीन मराठी सिनेमां आसात. ‘प्यार का दर्द है, मीठा मीठा प्यारा प्यारा’ ही कौटुंबिक आनी भुरग्यां खातीर ‘तेनालीराम’,  टीव्ही वयल्या माळांनी मुल्ला नसीरुद्दीनाची भूमिका साकारल्या. फाटलीं चार वर्सा मेरेन तांचें काम चालूच आशिल्ले. मागीर मात तांणी विसव घेतिल्लो. हालींच तांगेलें वजन झपाझप उणें जावपाचें दिसून आयल्ले, उपरांत केल्या तपासणेत दोतोरांनी लंग्स कॅन्सराचें दुयेंस बळावलां अशें सांगलें. हॉस्पिटलांत उपचार घेत आसतना पयर रातीं ते संवसाराक अंतरले. ज्युनियर मेहमूद हांकां भावपूर्ण आर्गा.