भांगरभूंय | प्रतिनिधी
दरेक शार सुदारपाक जाय. ताची उदरगत जावपाक जाय. मात, ती लोकांक नदरे मुखार दवरून. तांकां शारांत मेकळेंपणान भोंवपाक मेळूंक जाय, गाडी चलोवंक मेळूंक जाय, रस्ते गुळगुळीत आसूंक जाय. फोंडकुलां, कोयर, हेडगीं गोरवां आसूंक जायना. घाणयारें उदक, पावसाचें उदक वचपाक सिवरेज, गटार वेवस्था सारकी जाय. शारांत पावस पडलो काय बुडटी येवंक जायना. 24 वरां उदक, लायट जाय. कोयर कुसून घाणी- गुठ्ठाणी येवंक फावना, गरजेच्यो सुविधा जाय. देखीक शाळा, भलायकी केंद्र, बाजार! लोकांक शांतपणान न्हिदपाक मेळपाक जाय. आवाज, हवेचें प्रदुशण आसूंक फावना…. तरुच त्या शाराक खऱ्या अर्थान स्मार्ट सीटी म्हणूं येता. अशीं शारां आमकां चुकूनच मेळटलीं. पणजी शार स्मार्ट सीटी जालां, अशें म्हणटाले, पूण अजून 55 टक्के कामां अर्दकुटीं आसात, अशी म्हायती खुद्द घर निर्माण राज्यमंत्री कौशल किशोर हांणी लोकसभेंत दिली. खासदार फ्रान्सीस सार्दीन हांणी तो प्रस्न विचारिल्लो. आतां जून 2024 मेरेन उरिल्लीं कामां पुराय करपाची मुजत वाडोवन दिल्या. घडये ती डिसेंबर 2024 मेरेन वाडूं येता.
पणजे वांगडां हेर शारांय स्मार्ट करपाचें काम चलता. पूण स्मार्ट सीटी ही येवजण खास करून पणजी शारा पुरती आसा. फाटलीं दोन वर्सां हें काम चलतालें. कांय कडेन तें पुराय जालां. मात, काॅण्ट्रेक्टरान परत त्या कामांचेर नदर मारूंक ना. सांतिनेजांत कांय कडेन पार्किंगे खातीर आशिल्लो जागो उंच करून थंय पेव्हर्स घाल्यात. देखून लोक रस्त्याचे दोनूय वटेन गाडयो दवरतात. जंय केन्ना येरादारीची कोंयडी जायनाशिल्ली, थंय आतां ती जावंक लागल्या. कांय जाणांचे गाडे काडिल्ले, वर्स जालें तरी तो जागो खणून दवरला. पीडब्ल्यूडी मुख्यालया मुखार आशिल्लो रस्तो मे म्हयन्यांत खणिल्लो, दुरुस्त केल्लो. तो आतां परत खणून दवरला. म्हणजे एक – एक खातें एकठांय काम करपा बदला आपल्याक फावता तेन्ना, निधी मेळटा तेन्ना काम करता, अशें दिसता. गंवडो घर बांदतना एक मिटर उंच बांदकाम करता आनी मागीर आठ दीस गायब जाता, परत येवन दोन मिटर काम करून परतून पंदरा दीस गायब जाता. तसलोच प्रकार पणजी शारांत चल्ला. एक काम निटायेर घालें, अशें जावंक ना. रस्तो सपाट ना. मदींच खोल, मदींच उंच. चलत वचपी, गाडी चलोवपी हांकां ताचो अदमास येना. अपघात जावपाची भिरांत. हांगाच्यान वचपी वाहनां पडून अपघात जाल्यात. कामगार जखमी जाल्यात.
फाटीं थळावे आमदार बाबूश मोन्सेरात हांणी कामाच्या दर्ज्या विशीं आपूण समाधानी ना, अशी प्रतिक्रिया दिल्ली. लोक म्हूण खंय समाधानी आसात? स्मार्ट सीटीची येवजण 25 जून 2015 दिसा सुरू जाल्ली. मे 2016 त पणजेची निवड जाल्ली. देशांतल्या 7929 मदले 5883 प्रकल्प पूर्ण जाल्यात. तांचेर 73 हजार कोटी रुपयांच्या वट्ट निधींतले 66 हजार कोटी रुपया खर्च जाल्यात. गोंयांत सगल्यांत चड खर्च इंटेलिजंट सिस्टम वेवस्थापन आनी सीसीटीव्ही कॅमेऱ्यांचेर जाला. 214 कोटी रुपया. सीसीटीव्ही कॅमेरे चल्ल्यार पुरो! आतां उरिल्लें काम पळयल्यार निधी वाडोवचो पडूं येता. पणजेचें काम 2016 ते 2022 ची सुरवात मेरेन जावंक नाशिल्लें. मदीं कोरोनाचो काळ गेलो. सादारण चार वर्सां निधी तिजोरेंत पडून आशिल्लो, काय… कितें तें राखणदारांक खबर आसतलें. उपरांत अमूक काळांत कामां चालू जावंक नात, जाल्यार निधी परत वतलो अशें जाहीर जाले…. आनी कामाक नेट आयलो. पूण तें पद्दतशीरपणान सुरू जावंक ना. हांगा खणून दवर, थंय राशी मारून दवर…! एक- एक भाग हाता वेगळो केल्लो जाल्यार काम बेगीन सोंपपाचें. महालक्ष्मी देवळा कडलें 100 टक्के काम पूर्ण करून मागीर सांतिनेज वचपाचे, पूण तशें जावंक नाशिल्ल्यान पणजी शाराच्यो तिस्त्यो वादऱ्यो जाल्यो. राजधानी शार आशिल्ल्यान हांगा लोकांची, गाडयांची गर्दी आसता. खणून दवरिल्ल्यान तांकां कितें भोगचें पडटा, तें तेच जाणात.
‘इमॅजिन पणजी स्मार्ट सिटी डेव्हलपमेंट लिमिटेड’ कंपनीन 35 प्रकल्प हातांत घेतल्यात. तातूंतले 16 पूर्ण जाल्यात. ताचेर 341 कोटी 79 लाख रुपया खर्च जाल्यात. आतां उरिल्ल्या 19 प्रकल्पांचेर 594 कोटी 96 लाख रुपया खर्च करतले. उरिल्ल्या प्रकल्पांचो आंकडो पळयल्यार काम दिल्ले नवे मुजतींत जातलें, हाची खात्री दिवं नजं. आतां काम पुराय करपाचे मुजतीची तारीख पे तारीख पडत रावना जाल्यार पुरो. आमी आपले पणजी केन्ना तरणी जातली, ताची वाट पळोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
