भांगरभूंय | प्रतिनिधी
कोची, खबरां संस्था : हुंड्याची मागणी पुराय करूंक पावूंक नाशिल्ल्यान केरळचे एके २६ पिरायेच्या दोतोरान आत्महत्त्या केली. केरळांतल्या तिरुवनंतपुरमांत ही घडणूक घडली. केरळाची भलायकी मंत्री वीणा जॉर्ज हांणी हे विशीं चवकशी करपाचो आदेश दिला. हे चलयेचें नांव डॉ. शहाना. ही तरणाटी तिरुवनंतपुरमच्या सरकारी वैजकी म्हाविद्यालयांत सर्जरी ह्या विशयाचें पोस्ट ग्रॅज्युएशन करताली.
पुलिसांनी हे विशीं डॉ. शहाना हांच्या कुटुंबा कडेन चवकशी केली. ते उपरांत तिच्या मोग्याक ताब्यांत घेतलो. तिच्या मोगीची चवकशी सद्या चालू आसा. डॉ. शहाना हिच्या मोगीच्या घरांतल्यानी हुंड्यांत ज्यो मागण्यो केल्यो त्यो पुराय करप शक्य नाशिल्ल्याचो ताण घेवन तिणें स्वताक सोंपयली.
डॉ. शहानाच्या कुटुंबाचे आरोप
डॉ. शहाना हिच्या कुटुंबान केल्ल्या आरोपांत, तिचो मोगी डॉ. रुवैस हाच्या कुटुंबान हुंड्यांत १५० ग्रॅम भांगर, १५ एकर जमीन आनी बीएमडब्ल्यू कार मागिल्ली. आमी ती मागणी पुराय करपाक शकना हें आमी तांकां सांगिल्लें. उपरांत डॉ. रुवैस आनी ताच्या कुटुंबान लग्न मोडलें. तेन्ना डॉ. शहानान हें पावल उबारलें.
तिणें बरयल्ले सुसायड नोटींत ‘सगळ्यांक पयसोच प्रिय आसता’ अशें बरयलां.
ह्या प्रकरणा उपरांत केरळची भलायकी मंत्री वीणा हांणी चवकशीचे आदेश दिल्या. हे विशीं अहवाल सादर करपाक सांगला. तशेंच राज्य अल्पसंख्याक आयोगानूय हे विशीं दखल घेतल्या. राज्य महिला आयोगाची अध्यक्ष पी. सतीदेवी हिणें डॉ. शहाना हांच्या घरा वचून तिच्या कुटुंबियांची भेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
