भांगरभूंय | प्रतिनिधी
नवी दिल्ली, खबरां संस्था ः हालींच नॅशनल क्राइम रेकॉर्ड ब्युरोन 2022 वर्साचो अहवाल जाहीर केला, तांतूत दिल्ली हें बायलां खातीर सगळ्यांत असुरक्षित शार अशें म्हणलें. ही घडणूक दिल्लींतल्या आनंद पर्वत वाठारांतली. बिरेस्तारा एका 54 वर्सा पिरायेच्या मनशान 17 वर्सा पिरायेचे चलयेचेर अॅसिड उडयले. आनी उपरांत ताणें स्वता अॅसिड पियेलें. आरोपी प्रेम सिंग हांणे चलयेचेर तिच्या घरा मुखार हल्लो केल्ल्याचें पुलिसांनी सांगलें. हांतूत पिडित चली मात्शें जळ्ळें. जाल्यार आरोपीक उपचारा वेळार मरण आयलें.
दिल्ली पुलिसांनी दिल्ले म्हायती प्रमाण प्रेम सिंगाचेर नेण्टे चलयेचेर बलात्कार केल्ल्याचो आरोप आशिल्लो. ह्या प्रकरणांत तो बंदखणींत आशिल्लो. एका लग्न सुवाळ्याक हाजीर रावपा खातीर 29 नोव्हेंबराक ताका अंतरीम जामीनाचेर सोडलो.
कागाळ फाटीं घेवपाचो दबाव
चलयेच्या आवयन प्रेमसिंगाचेर बलात्काराची कागाळ नोंद केल्ली. बंदखणींतल्यान भायर आयले उपरांत तो चलयेच्या कुटुंबाक धमकायत रावलो. बिरेस्तारा सकाळीं साडेसात वरांचेर लेगीत आरोपीन चलयेक बलात्काराची कागाळ फाटीं घेवपाची धमकी दिल्ली. चलयेन ती कागाळ फाटीं घेवपाक न्हयकार दिलो. उपरांत आरोपीन तिचेर अॅसिड हल्लो केलो.
मजगतीं, फाटल्याय वर्सा 14 डिसेंबराक दिल्लींतल्या द्वारका वाठारांत 17 वर्सा पिरायेचे चलयेचेर अॅसिड हल्लो जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
