खरेंच, दुनिया झुकती है….

भांगरभूंय | प्रतिनिधी

कांय काळान हे ठकसेन दुसऱ्या नांवान वॅबसायट उक्ती करतले आनी परतून लोकांक चुनो लावपाक सुरवात करतले. मागीर उपाय कितें? लोकांनी शाणें जावप, होच रामबाण उपाय.

झुकती है दुनिया, झुकानेवाला चाहीए… हें 1951 तल्या ‘सगाई’ सिनेमांतलें पद. आयच्या काळाक पसून हें ज्युस्त लागू जाता. तातूंत तथ्य आशिल्ल्याचेंय जाणवता. खास करून गुन्यांवकारीच्या मळार. घरफोडी, चोरयो जावपाचें प्रमाण देवूंक ना. मात, आतां घरांत बाज्जेर आड पडून संवसारांतल्या कोणाकूय फटोवं येता. हें इंटरनॅटाक लागून शक्य जालां. विज्ञानाच्या सोदाचे फायदे आसात, तशे तोटेय आसात…. आनी आधुनीक तंत्रज्ञानाचो फायद्या परस गैरफायदो घेवपी लोक चड आसात. दोन दिसां पयलीं बंगळुरूंत एक घडणूक घडली. अर्धवेळ वा घरांत बसून नोकरी दिवपाचें हांयस दाखोवन एकल्याक 61 लाख रुपयांची तोपी घाली. पुलिशेंत नोंद जांवक नाशिल्ल्यो वा नोंद जावनूय एक पयसो पसून परत मेळूंक नाशिल्ल्यो शेंकड्यांनी घडणुको आमच्या देशांत घडल्यात. आतां इलेक्ट्रॉनिक्स आनी म्हायती तंत्रज्ञान मंत्रालयान पार्टटायम जाॅब दिवपाचें नाटक करून लोकांक फटोवपी 100 वयर वॅबसायटी ब्लाॅक केल्यात. पूण ताचो व्हडलोसो फायदो जायत सो दिसना. कारण कांय काळान हे ठकसेन दुसऱ्या नांवान वॅबसायट उक्ती करतले आनी परतून लोकांक चुनो लावपाक सुरवात करतले. मागीर उपाय कितें? लोकांनी शाणें जावप, होच रामबाण उपाय.
अमूक उतरां टायप करून दिवपाचीं. तुमकां उतरां फाटल्यान अमके पयशे दितले, अशी एक आकर्शक येवजण आॅनलायन मेळटा. ते फोन करून तुमचे कडेन संपर्क करतात. अटी, नेमाचो काॅण्ट्रेक्ट भरून घेतात आनी तुमकां काम दितात. म्हयनोभर मानधन दितात. मागीर तुमच्या चुकांक लागून कंपनीक लुकसाण जालें, काम सोडपाक मेळचें ना. तुमी काॅण्ट्रेक्ट सायन केला, अशें सांगतात. उपरांत तांचो वकील तुमचेर केश घालता. कांय दिसांनी अमूक पयशे भरात. प्रकरण मिटोवया अशें सांगता. तुमी आडकल्ले आसतात. थोडे लडटात, थोडे पयशे भरून मेकळे जातात. कांय ठकसेन व्हिडिओ लायक करात, पयशे मेळयात, अशी आॅफर दितात. गुगल मॅपा वयलो रिव्ह्यू, 5 स्टार रेटींग हिंवूय स्कॅमां. रेटींग दिवपाक पयशे मेळटात जाल्यार कोणूय तें दितलो. रेटींग दिलें काय तुमचो ईमेल आयडी भौशीक जावपाची भिरांत आसता. कांय जाण लींक, स्क्रिनशाॅट्स दिवपाक सांगतात. पयशे दिवपाच्या वेळार रिव्ह्युचो स्क्रिननशाॅट शॅर करपाक सांगतात. कोड मागतात. कांय जाण बँकेचो तपशील मागतात. शंबरांतले 10 जाण फटवल्यार पुरो. एके रातीन तांचो बँक अकावंट रिकामी.
ओटीपी मागतात. व्हडले आॅनलायन कंपनींतल्यान फोन येतात वा लींक धाडटात. बँकेंच्या नांवान एसएमएस येतात. ओटीपी दिवप म्हणजे… ! कांय जाण कितें तरी निमतां सांगून पयशे मागतात. गोंयांत जायत्या जाणांक हाचो अणभव आयला आसतलो. एटीएम कार्ड ब्लाॅक जालां, बँक खातें डिएक्टीवेट जालां. मात्सो हें लींक क्लीक करात, अशी मॅसेज येता. पयलीं ठकसेन फोन करताले. चडशे उत्तरे कडले. आतां फोन येवप उणें जालां. केव्हायसी अपडेट करात, अशे मॅसेज तर सदचेच जाल्यात. ते येतकच संबंदीत बँकेंत वचून तपासपाक जाय. आयफोनाचें इनाम मेळ्ळां, अमूक पयशे भरात, अशेय संदेश येतात. लायटीचें बील भरपाचें उरलां. सोमार मेरेन भरात, नाजाल्यार कनेक्शन तोडटले. मागीर मूळ खऱ्या लिंकां सारकें लींक येता आनी…!!
आॅनलायन वेव्हार करप्यांनी दुबावीत लींक, खाजगी म्हायती मागपी लींक, अर्जाचेर क्लीक करपाक जायना. पासवर्ड शक्य आसल्यार स-स म्हयन्यांनी बदलपाक जाय. ओटीपी कोणाक दिवपाक जायना. ईमेल, टेक्स्ट मॅसेजी वरवीं कोणाक पासवर्ड, आधारकार्ड नंबर वा वैयक्तीक कसलेच नंबर धाडपाक जायना. खास करून अर्थीक वेव्हारां कडेन संबंदीत आशिल्ले. सायबर गुन्यांवां विशी, सुरक्षे विशीं म्हायती दिवपी वॅबसायटी आसात. ताचे वयली म्हायती नेमान वाचप गरजेचें. खंयच्योच बँको, आस्थापनां तुमचो पासवर्ड, ओटीपी मागनात. थोडे सादूर रावल्यार अर्थीक ठकसेनां पसून स्वताक वाटावप शक्य आसा. कांय थारावीक वेव्हार, सोशल मिडिया, मनोरंजन इतले पुरतोच मोबायल वापरूंक जाय. दिसता तें लींक टॅप करचें न्हय. सवाय खाण पोटफुगें म्हणटात, तशें पयशांचे आशेन आॅनलायन पावल मुखार घालें जाल्यार 99 टक्के तुमी फोंडांत पडटले. कश्ट करिनासतना हांगा कांय मेळना आनी मेळ्ळेंय जाल्यार तें पचना, हें सदांच मतींत दवरचें!