भांगरभूंय | प्रतिनिधी
केंद्रीय अर्थमंत्री निर्मला सीतारमणचो सेगीत पांचवे खेपे आस्पाव
खबरां संस्था ः फोर्ब्सच्या शंबर बळिश्ट बायलांच्या वळेरेंत मूळ भारतीय चार बायलांक सुवात मेळ्ळा. हे वळेरेंत केंद्रीय अर्थमंत्री निर्मला सीतारमण 32 वे सुवातेर आसा. हे वळेरेंतल्या हेर तीन भारतीय बायलां मदीं एचसीएल कॉर्पोरेशनाची सीईओ रोशनी नादर मल्होत्रा (60 वे सुवातेर), स्टील अथॉरिटी ऑफ इंडियाची अध्यक्ष सोमा मंडल (70 वे सुवातेर), आनी बायोकॉन संस्थापक किरण मुझुमदार- शॉ (76 वे सुवातेर) आसात.
हे वळेरेंत सेगीत पांचवे खेपे निर्मला सीतारामन हिणें सुवात मेळयल्या. फाटल्या वर्सा हे वळेरेंत ती 36 वे सुवातेर आशिल्ली. म्हणल्यार हे खेपे ती 4 सुवातींनी वयर आसा. 2021 वर्सा तिका 37 वी सुवात मेळिल्ली.
उर्सुला वॉन डर लेयन पयले सुवातेर
फोर्ब्साच्या वर्सुकी बळिश्ट बायलांच्या वळेरेंत युरोपीय आयोगाची मुखेली उर्सुला वॉन डर लेयन पयल्या क्रमांकाचेर आसा. उपरांत युरोपीयन सेंट्रल बँकेची बॉस क्रिस्टीन लागार्ड दुसरे सुवातेर आनी अमेरिकेचो उपाध्यक्ष कमल हॅरिस तिसरे सुवातेर आसा.
दर वर्सा अमेरिकन बिझनेस मॅगझीन संवसारांतल्या शंबर बळिश्ट बायलांची वळेरी उजवाडायता. फोर्ब्सच्या मतान पयशे, मीडिया, प्रभाव आनी प्रभावाचे क्षेत्र ह्या चार मुखेल मेट्रीकांचेर आदारून क्रमवारी थारायता. राजकी फुडाऱ्यां खातीर नेमाळ्यान जीडीपी आनी लोकसंख्या अशे मापदंड घेतले, जाल्यार कॉर्पोरेट फुडाऱ्यां खातीर येणावळ, मोल आनी कर्मचाऱ्यांची संख्या घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
