भांगरभूंय | प्रतिनिधी
नवी दिल्ली, खबरां संस्था ः केंद्रीय इलेक्ट्रॉनिक्स आनी म्हायती तंत्रज्ञान मंत्रालयान (MeitY) 100 परस चड संकेतथळां ब्लॉक केल्यात. संघटीत गुंतवणूक आनी कार्य आदारीत पार्ट टायम नोकरी घोटाळ्यांत हे संकेतथळांचो आस्पाव आशिल्लो. फाटल्या सप्तकांत नॅशनल सायबर क्राइम थ्रेट अॅनालिटिक्स युनिट (NCTAU) ह्या पोर्टलांची तपासणी करुन ही कारवाय केली.
हे संकेतथळ परदेशांतल्यान चलतात अशें अधिकृत निवेदनांत म्हणलां. कार्ड नेटवर्क, क्रिप्टोकरन्सी, परकी एटीएमांतल्यान पयशे काडप आनी आंतरराष्ट्रीय फिनटेक कंपनींचो वापर करून व्हड प्रमाणांत अर्थीक फटवणूक करून एकठांय केल्ले पयशे भारतांतल्यान व्हेले. हे संबंदीं हेल्पलायन आनी राष्ट्रीय सायबर गुन्यांव पोर्टलाचेर जायत्यो कागाळी आयल्यो.
अशा घोटाळ्यांत डिजिटल जायरातींचो वापर जाता अशें गृह मंत्रालयान सांगलां. “घरांतल्यान नोकरी” आनी “घरांतल्यान पयशे कशे मेळोवचे” अशे की-वर्ड वापरून जायत्या भाशांनी गूगल आनी मेटा सारकिल्या प्लॅटफॉर्मांचेर जायरातीं सुरू जाल्यो. ह्या फटोवप्यांचे लक्ष्य निवृत्त कर्मचारी, बायलां आनी बेकार तरणाटे आसतात.
एकदां जायरातींचेर क्लिक केल्या उपरांत व्हॉट्सअॅप आनी टेलिग्राम वापरपी एजंट पिडिता कडेन संवाद सुरू करता अशें गृह मंत्रालयान सांगलें. ताका व्हिडियो लायक आनी सबस्क्रायब करप, रेटिंग दिवप सारकिल्ल्यो गजाली करपाक सांगात. सुरवेक काम पुराय जातकच कांय कमिशन दितात आनी दिल्ल्या कामाच्या बदलाक चड परतावो मेळोवपा खातीर गुंतवणूक करपाक सांगतात. ल्हवू ल्हवू त्या गजालींचेर पिडित मनशाचो विस्वास बसता आनी तांणी व्हड रक्कम जमा केल्या उपरांत ती रक्कम ते फारायतात.
सत्यापना बगर अर्थीक वेव्हार टाळचे
अशी फटवणूक टाळपा खातीर उपाय सांगतना गृह मंत्रालयान सांगलें, गुंतवणूक करचे पयलीं इंटरनॅटाचेर चड कमिशन फारीकणी करून प्रायोजीत केल्ले खंयचेय ऑनलायन येवजणेची जाणविकाय आसप गरजेचें. व्हॉट्सअॅप आनी टेलिग्रामाचेर अनवळखी मनीस संपर्क करता जाल्यार क्राॅसचेक बगर अर्थीक वेव्हार करप टाळचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
