भांगरभूंय | प्रतिनिधी
पणजीः लक्ष्मण पित्रे हें जायत्या गुणांचो समुच्चय आशिल्लें व्यक्तिमत्व आसा आनी तें हेरांक उर्जा दित आसता अशें प्रतिपादन आदलो केंद्रीय मंत्री अॅड रमाकांत खलप हांणे केलें. ओपा हांगा बुधवाराक नंदनवन फर्मांत ज्येश्ठ कवी, संस्कृताचो व्यासंगी लक्ष्मण पित्रे हांचो पिरायेचो अमृतवर्स पूर्ती कार्यावळ जाली. त्या वेळार अध्यक्ष म्हणून खलप उलयताले.
हे कार्यावळींत पित्रे हांच्या आषाढघन ह्या कविता झेल्याचे आनी अमृत गमय ह्या भोवमान ग्रंथाचें रमाकांत खलप हांच्या आनी वीज मंत्री सुदिन ढवळीकार हाचे हस्तुकीं प्रकाशन जाले. प्रमुक वक्ते म्हणून ज्येश्ठ साहित्यीक आनी समीक्षक डॉ सोमनाथ कोमरपंत, पित्रे हांची घरकान्न मनुश्री पित्रे माचयेर आशिल्ली.
आपूण वस्तुसंग्रहालय खात्याचो मंत्री आशिल्लो तेन्ना लक्ष्मण पित्रे त्या खात्याचे संचालक आशिल्ले. तांचे कडल्यान खूब किदें शिकपाक मेळ्ळें अशें सुदिन ढवळीकारान सांगलें. व्यत्पन्नता आनी रसता हांचो संगम पित्रे हांच्या व्यक्तिमत्वांत आसा. तांच्या लिखणाची शैली प्रभावी आसा. तांचे मदीं एक निरागस भुरगें ल्हिपल्लें आसा अशें डॉ कोमरपंत हाणे सांगलें. ज्येश्ठ पत्रकार सुरेळ वाळवे हांचेय ह्या वेळार भाशण जालें. म्हजी जीण म्हणल्यार एक सोबीत चित्र आसात. तातूंत जायत्या जाणांनी रंग भरल्यात. संस्कृत विद्येन म्हजी जीण समृद्द केल्या अशें भोवमानाक जाप दितना पित्रे हांणी सांगलें. सिद्धी उपाध्ये हाणे कार्यावळीचें सूत्रसंचालन केलें. गौरांग आनी वेदांक हांणी म्हणल्ल्या शांती मंत्रान कार्यावळीचो समारोप जालो. भोवमान ग्रंथांत लेख बरयल्ल्या लेखकांचो ह्या वेळार भोवमान केलो. कार्यावळीक साहित्यीक आनी हेर मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
