फटवणूकी पसून सावध रावपाक वापरात ‘मास्कड’ आधार

भांगरभूंय | प्रतिनिधी

आयच्या काळांत आधार हो एक म्हत्वाचो दस्तावेज जाला. बँक खातें उगडप, शाळेंत, कॉलेजींत प्रवेश मेळोवपा खातीर, मालमत्ता विकत घेवपा खातीर, ड्रायव्हिंग लायसन्स आनी पॅन कार्ड मेळोवपा खातीर आनी वेगवेगळ्या सरकारी येवजण्यांचो लाव घेवपा खातीर आधार कार्ड गरजेचें. आधाराचो वापर जसो वाडला तसो तसो ताचे संबंदीत फटवणूक वाडल्या. ती जावची न्हय म्हणून युनिक आयडेंटिफिकेशन अॅथॉरिटी ऑफ इंडिया (UIDAI) हांणी ‘मास्कड’ आधार (Masked Aadhaar) सुरू केला. हाका लागून तुमचो तपशील चोरपाचो धोको उणो जाता. तशेंच हो एक सुरक्षीत पर्याय आसा.

मास्कड आधार म्हळ्यार कितें?

गुप्तताय वाडोवपा खातीर आनी आधार म्हायतीचो धोको उणो करपा खातीर युआयडीएआय ‘मास्कड’ आधार सुरू केला. मास्कड आधारांत आधार कार्डाचे पयले 8 अंक लिपिल्ले आसतात, जाल्यार निमाणे 4 अंक फकत दिसतात. पूण तातूंत नांव, फोटो आनी क्यूआर कोड सारकिल्ले म्हत्वाचे तपशील पळोवंक मेळटात.

खंय वापरूं येता?

युआयडीएआय च्या मार्गदर्शक तत्वां प्रमाण फकत परवानो आशिल्ल्या संस्थांनी तुमच्या आधार कार्डाचो तपशील आनी कार्ड सांठोवंक शकता. म्हळ्यार परवानो नाशिल्लीं संस्था तुमचे आदार घेवपाक शकनात. देखून जेन्ना जेन्ना तुमी परवानो नाशिल्ल्या संस्थे कडेन वतात तेन्ना तुमी मास्कड आधार वापरूं शकता. तुमी ते यूआयडीएआयच्या अधिकृत संकेतथळा वयल्यान सहजतायेन डावनलोड करूंक शकतात.

डाउनलोड कशें करप?

1. पयली myaadhaar.uidai.gov.in. ह्या संकेतथळार वचात.
2. उपरांत आधार नोंदणी क्रमांक घालात आनी कॅप्चा भरून ‘Send OTP’ हाचेर क्लिक करात. ते उपरांत Services विभागांत Download Aadhaar पर्याय निवडात.
3. Do you want a masked Aadhaar? चो पर्याय निवडात. हो पर्याय तुमका Review your Demographics Data खाला मेळटलो.
4. ते उपरांत Download हाचेर क्लिक करात. मास्कड आधार पीडीएफ फॉर्मेटांत डावनलोड जातले.
5. हें आधार कार्ड उगडपाक पासवर्डाची गरज लागतली. हाचे खातीर तुमकां पासवर्ड घालचो पडटलो. तुमच्या नांवाचीं पयली चार अक्षरां (आधार कार्डावयली) व्हड अक्षरांनी आनी तुमचें जल्म वर्स YYYY हातूंत घालचें पडटलें.