भांगरभूंय | प्रतिनिधी
नवी दिल्ली, खबरां संस्था : दूरसंचार मंत्रालयान १ जानेवारी २०२४ सावन नव्या मोबायल कनेक्शन खरेदीचे नेम बदल्ल्यात. ताका लागून आतां गिरायकांक नवें सिमकार्ड घेवप सोपें जालां.
देशांत डिजिटलायझेशन चालीक लावपा खातीर दूरसंचार विभागान म्हायती दिल्या. आतां नवें सिम कार्ड मेळोवपा खातीर पेपर बेस्ड केवायसी चेर पुरायेन बंदी आसतली. ताका लागून आतां नवें सिमकार्ड घेवपा खातीर गिरायकांक फकत डिजिटल वा ई- केवायसी सादर करचें पडटलें.
अधिसुचवणी जारी
दूरसंचार विभागान एक अधिसुचवणी जारी करून नव्या नेमां विशीं म्हायती दिली. नव्या वर्सा सावन म्हळ्यार १ जानेवारी २०२४ सावन सिम कार्ड खरेदीच्या नेमांनी व्हड बदल जावपाचे आसात. आतां खंयच्याय गिरायकांक सिमकार्ड मेळोवपा खातीर ई-केवायसी करप गरजेचें. आतां कागदाचेर आदारून आशिल्ल्यो केवायसी पुरायेन बंद जातल्यो, अशें अधिसुचवणेंत म्हणलां. तशेंच नवें मोबायल कनेक्शन घेवपाचे नवे नेम तशेंच उरतले. तातूंत कसलेच तरेचो बदल जावंक ना, अशें अधिसुचवणेंत सांगलां.
१ डिसेंबर २०२३ सावन सिम कार्डच्या नेमांनी बदल
पयलीं दुरसंचार मंत्रालयान सिमकार्डा कडेन संबंदीत आनीक एक नेम बदल्ला. नेमांनी बदल करून केंद्र सरकारान १ डिसेंबर सावन एके आयडीचेर मर्यादीत सीम जारी करपाचो नेम लागू केला. सिमकार्ड मेळोवपा खताीर केवायसी प्रक्रिया पुराय करप गरजेचें. आतां सिमकार्ड विकतें घेवपा वांगडा सिम विक्रेत्यांचीय नोंदणी करतले. जर खंयच्याय व्यक्तीन एकाच वेळा खुबशीं सिमकार्डां विकतीं घेतलीं जाल्यार तो फकत वेवसायीक कनेक्शना वरवीं सिमकार्ड विकतें घेवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
