भांगरभूंय | प्रतिनिधी
दर दिसा 3 बलात्काराची नोंद, एनसीआरबीचो अहवाल
नवी दिल्ली, खबरां संस्था ः नॅशनल क्राइम रेकॉर्ड ब्युरोन आयतारा, 3 डिसेंबराक 2022 वर्साचो अहवाल जाहीर केलो. दिल्ली हें बायलां खातीर सगळ्यांत असुरक्षित शार अशें अहवालांत म्हणलां. दिल्लींत 2022 वर्सा दर दिसांत 3 बलात्काराची प्रकरणां नोंद जाल्लीं.
देशांत बायलां आड वट्ट 4 लाख 45 हजार 256 गुन्यांव नोंद जाल्यात अशें एनसीआरबीच्या 546 पानांच्या अहवालांत म्हणलां. हाचोच अर्थ दर वराक सुमार 51 एफआयआर दाखल जाल्यात. 2021 वर्सा हो आंकडो 4 लाख 28 हजार 278 आशिल्लो.
2021 वर्साच्या तुळेंत बायलां आड जावपी गुन्यांव 4 टक्क्यांनी वाडल्यात अशें अहवालांत म्हणलां. जाल्यार 2022 वर्सा 28 हजार 522 खूनांची नोंद जाला म्हळ्यार दिसाक 78 खून जाले.
देशांत 4 राज्यांचे वेंचणुकेचे निकालांची चर्चा आशिल्ली त्याच दिसा देशांत भुरगीं, अनुसुचीत जाती (एससी), अनुसुचीत जमाती (एसटी) आनी सायबर गुन्यांवांत खूब वाड जाल्या असो एनसीआरबीन आपलो अहवाल जाहीर केलो.
एनसीआरबीच्या अहवाला प्रमाण भारतीय दंड संहिता (आयपीसी) आनी खाशेले आनी थळावे कायदे (एसएसएल) खाला नोंद जाल्ल्या गुन्यांवांत उणाव जाला. अहवाला प्रमाण दर लाख लोकसंख्येक नोंद जाल्ल्या गुन्यांवांची संख्या 2021 वर्सा 445.9 आशिल्ली ती 2022 वर्सा 422.2 इतली उणी जाला. 2022 वर्सा 58 लाख 24 हजार 946 गुन्यांव नोंद जाल्यात, तातूंत 35 लाख 61 हजार 379 भारतीय दंड संहिता (आयपीसी) आनी 22 लाख 63 हजार 567 खाशेल्या आनी थळाव्या कायदो (एसएलएल) गुन्यांवांचो आस्पाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
