भांगरभूंय | प्रतिनिधी
भुवनेश्वर, खबरां संस्था ः ओडिशाच्या कंधमाल जिल्ल्यांत एका तरणाट्यान आपल्या चार इश्टां सयत आपले 25 वर्सा पिरायेचे भयणीचेर सामुहीक बलात्कार करुन मागीर तिका कुराडीन जिवेशीं मारून उडयली. 3 नोव्हेंबराक ही घडणूक घडिल्ली.
पुलिसांच्या म्हणण्या प्रमाण, भयणीचो व्हडलो भाव आनी मेवणी हांचे मदीं अनैतिक संबंद आशिल्ले. पिडित चलयेक तें कळ्ळें. तिणें आपल्या भावाक ते नातें सोंपपाक सांगलें, नाजाल्यार कुटुंबाक हे विशीं सांगतलें, अशें शिटकायलें. पूण आपली भयण घरांन सगळें सांगतले हे भिरांतीन भावान तिका मारपाचें चिंतलें. घडणुकेच्या दिसा पिडित चली पानां एकठांय करपाक रानांत गेल्ली. ह्या वेळार व्हडल्या भावान आपल्या चार इश्टांक थंय आपयले आनी सगल्यांनी मेळून तिचेर सामुहीक बलात्कार केलो. बलात्कार जाले उपरांत आरोपी भावान भयणीचेर कुऱ्हाडीन हल्लो केलो. ताका लागून तिका मरण आयलें.
उपरांत आरोपीन 6 नोव्हेंबराक पुलिशेंत वचून आपली भयण बेपत्ता आशिल्ल्याची कागाळ केली. दुसऱ्या दिसा 7 नोव्हेंबराक पुलिसांक विकृत अवस्थेंत पिडित बायलेची कूड रानांत मेळ्ळी.
पोस्टमार्टमांत हे बायलेचेर जायत्या जाणांनी बलात्कार करून तिका जिवेशीं मारली हें उजवाडाक आयलां. पुलिसांनी तपास सुरु केलो आनी 2 डिसेंबराक सगल्या आरोपींक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
