भांगरभूंय | प्रतिनिधी
नवी दिल्ली, खबरां संस्था ः टेक कंपनी गूगल आयच्यान निश्क्रीय जीमेल खातीं बंद करतली. अंदूं मे म्हयन्यांत कंपनीन दोन वर्सां परस चड काळ निश्क्रीय आशिल्लीं खातीं काडून उडोवपाची घोशणा केल्ली.
निश्क्रीय खातें धोरण अद्ययावत करतना कंपनीन सांगिल्लें जीमेल वापरप्यांक स्पॅम, फिशिंग आनी खातें हायजॅकिंग सारकिल्या फटवणूकी पसून राखण दिवपा खातीर हो निर्णय घेतला. बरोच तेंप वापरूंक नाशिल्ल्या खात्यांत घुस्पागोंदळ जावपाची चड शक्यताय आसता, अशें कंपनीचें मत. अशा वेळार गुन्यांवकार ह्या खात्यांचो उपेग चुकीचें काम करपाक करूं शकता.
निश्क्रीय खातें धोरण आयज सावन प्रभावी जालां, पूण निश्क्रीय खातीं रोखडींच काडून उडोवचीं नात अशें गूगलान ब्लॉग पोस्टां वरवीं सांगलां. कंपनी डिसेंबर 2023 सावन अशीं खातीं डिलीट करपाक सुरवात करतली. एकदां जीमेल खातें काडून उडयल्या उपरांत वापरप्याक मेल, गूगल ड्रायव्ह, दस्तवेज, गूगल फोटो सयत त्या खात्या कडेन संबंदीत गूगल सेवा वापरूंक मेळची ना. पूण ह्या धोरणांतल्यान फकत वैयक्तीक खातीं काडून उडयतले. खंयचीच शाळा, संस्था वा वेवसायीक खातें काडून उडोवचे नात. वापरप्यांक तांचें खातें डिलीट करचे पयलीं जायत्यो सुचोवण्यो धाडटले अशें गूगलान सांगलां.
तुमचें खातें सक्रिय कशें दवरप?
तुमचें जीमेल खातें सक्रिय दवरपा खातीर, तुमी दर 24 म्हयन्यांनी एक फावट तरी सायन इन करचें पडटलें. वापरप्यान गूगल खातें वापरून खंयचेय सेवेंत सायन इन केल्यार तें खातें सक्रिय मानतले आनी तें काडून उडोवचें ना अशें गूगलान सांगला. तुमच्या खात्यांतल्यान मेल धाडून, गूगल ड्रायव्ह वापरून, यू ट्यूब व्हिडियो पळोवन, गूगल प्ले स्टोरांतल्यान ऍप्लिकेशनां डाउनलोड करून वा हेर कडेन खातें वापरून सायन इन करून तुमी तुमचें खातें सक्रिय दवरूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
