येरादारींत आडकून उरल्यार ‘प्रेशर’ वाडूं येता

भांगरभूंय | प्रतिनिधी

नवी दिल्ली, खबरां संस्था ः देशभरांतल्या लाखांनी लोकांक दर दिसा येरादारी कोंयडीचो त्रास जाता. मानसीक ताण येवपा वांगडाच येरादारींत आडकून पडप शारिरीक नदरेनय त्रास दिवंक शकता. गाडयेची वाट लागता ती वेगळी. ‘बम्पर टू बम्पर’ येरादारी इंधनाची, सैमाची वाट लायताच, पूण रक्तदाबूय वाडयता अशें एका नव्या अभ्यासांत दिसून आयलां.
चड मीठ खावप हें प्रेशराचें कारण, तशेंच येरादारीची कोंयडी हें पसून एक कारण अशें वॉशिंग्टन विद्यापिठाच्या संशोधनांतल्यान दिसून आयला. हाचें कारण म्हळ्यार काळजाक लागून जावपी समस्या वाडपाची शक्यताय आसा. वॉशिंग्टन विद्यापिठांत पर्यावरण आनी वेवसायीक भलायकी विज्ञानाचे प्रा. जोएल कॉफमन ([email protected]) हांणी हें संशोधन केलां. तांच्या मतान, अर्द वरा वयर येरादारींत आडकून पडल्यार प्रेशर खूब वाडटा. ताचो परिणाम कुडीचेर 24 वरां तरी उरता.

उपाय कितें?

येरादारी सुदरप आनी गाडी चलोवप उणें करप हो एक बरो उपाय, अशें कॉफमन हांचे मत आसा. वैयक्तीक पांवड्यार येरादारींत उणो वेळ घालोवप बरें. संबंदीत खात्यांनी भौशीक येरादारी (बस, रेल्वे) वाडोवप, शाॅर्ट कट मार्ग सोदप,अशे उपाय घेतल्यार येरादारीची गचमुड्डी उणीं जावं येता.