भांगरभूंय | प्रतिनिधी
नवी दिल्ली, खबरां संस्था ः भारतीय तरणाट्यांक सप्तकांतले 70 वरां काम करपाचो सल्लो दिवपी इन्फोसिसचे संस्थापक नारायण मूर्ति परतून एक फावट चर्चेंत आयल्यात. भारतीयांनी 3 शिफ्टींनी काम करचें. 11 ते 5 अशी शिफ्ट करुन उदरगत जावची ना. हांचेर बेगीन निर्णय घेवपाची गरज आसा अशें मूर्ती हांणी सांगले.
मूर्तींन म्हणलें, भारताची अर्थवेवस्था 3.5 ट्रिलियन डॉलर आसा, जाल्यार चीनाची अर्थवेवस्था 19 ट्रिलियन डॉलर मेरेन पावल्या. एका वेळार आमचे सारक्यो समस्या थंय आशिल्ल्यो, पूण चीनान ताचेर उपाय सोदून काडलो आनी तो आमचे मुखार पावलो. आमी चीनाक सहज फाटीं घालूंक शकतात. ताचे खातीर बेगीन निर्णय घेवचे पडटले.
एके कार्यावळीत उलयतना मूर्ती हांणी सरकारान दिल्ल्या फुकट सेवां विशीं म्हणलें, “हांव फुकट सेवां आड ना, पूण फुकट सेवा आनी सरकारी अनुदान मेळपी सगळ्यांनी ताचे बदला समाजाच्या कल्याणा खातीर योगदान दिवचें. फुकट येवजण्यो सशर्त आसपाक जाय.” मुळाव्या आनी माध्यमीक शाळांनी हाजिरी 20% वाडली जाल्यारूच ह्यो सेवा मेळटल्यो अशें सरकारान लोकांक सांगचें.
मूर्तीन म्हणलें, हांगां कर्नाटकांत बरेच लोक आपल्या भुरग्यांक कन्नड माध्यमाच्या शाळांनी धाडनात. तांचीं भुरगीं सदांच इंग्लीश माध्यमांतल्या शाळांनी शिकतात. देखून इंग्लीश माध्यमांतल्यान शाळा उगडप आनी चलोवप सोंपें आनी फुकट करपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
