भांगरभूंय | प्रतिनिधी
वर्ल्ड कप क्रिकेट सर्त हालींच सोंपली. करोडो लोकांनी क्रिकेटीचो आनंद घेतलो. भारतान सगल्यो मॅची जिखून संवसारीक विक्रम
केलो. पूण निमाणे मॅचींत हार घेवची पडली. ताका लागून भारताची एकंदर कामगिरी दुबावीत आसा अशें विधान आयकूंक येता. जायत्या जाणांनी भारतीय पंगडाचेर आरोप केल्यात. हे मॅचीची शस्त्रक्रिया करून जायत्या जाणांक दोश दिवपाचोय यत्न जालो. ‘‘भारत वेगळे पद्दतीन खेळिल्लो जाल्यार तो जिखपाचो. रोहित शर्माक वायट शॉट मारपाची गरज नाशिल्ली. ताका लागून भारत हारलो. भारत दुबळो जालो. भारतीय पंगडांतली उर्जा खंय देंवली? हाचीं कारणां कितें?’’ अशीं वेगवेगळीं मतां. भारताक परत एक फावट हो जागतीक मुकुटमणी मेळचो ही सगळ्यांचीच इत्सा आशिल्ली. पूण तशें जालें ना. हाचो अर्थ भारत दुबळो आसा असो न्हय. सुरवाती सावन ह्या झुजांत भारताची कामगिरी उत्कृश्ट आसा, हें मान्य करचें पडटलें. भारत जिखूंक ना हाका जायतीं कारणां आसात. ऑस्ट्रेलियेन सुरवेक टॉस जिखून येसाचें पयलें पावल उखल्लें. हातूंत भारताक यश मेळूंक ना हें तितलेंच म्हत्वाचें. फाटल्या कांय वर्सांत भारताच्या एकंदर सरासरी परस ऑस्ट्रेलिया बरो पंगड अशें तांणी दाखयलां. तांणी संवसारीक पांवड्यार खास कामगिरी एक फावट केली तरी हालींच्या काळांत भारतान सगल्यां मुखार वचून एक बरो पंगड म्हूण आपली प्रतिमा तयार केल्या.
खेळांत येस आनी अपेस सतत चलता. तेन्ना संवसारीक क्रिकेट झुजांत भारताचें अपेसाचेर टिका करप योग्य दिसना. फाटल्या धा मॅचींनी भारतान कशी कामगिरी केल्या तेंय मतींत घेवप तितलेंच म्हत्वाचें. एकेच मॅचींतल्यान भारताच्या एकंदर कामगिरी मुखार प्रस्न उबो करप चुकीचें. भारतीय पंगडान हे मालिकेंत खेळपाचे पद्दतीचेर नदर मारल्यार विश्वचषकाचो मुकुट भारताचे तकलेरुच येवपाचो. पूण निमाणे मॅचीचो दीस भारतीयांचो नाशिल्लो. भारताची बॅटिंग जे पद्दतीन सुरू जाली, तें पळोवन जैत आमकांच मेळटलें, अशी अपेक्षा आशिल्ली. पूण, तांचे बॅटिंगे वेळार सिराज आनी मोहम्मद शमी हांकां आदल्या मॅचींनी जे तरेन बाॅलिंग घाली तशी घालपाक जमलें ना. दर खेपे एकूच प्रकारची उर्जा आसप शक्य आसूं येता वा नासूंय येता. तांची कामगिरी सगळ्यांचे मानसीकतायेचेर आदारून आसता. धा मॅचींनी भारताचो दीस आशिल्लो. पूण…
ही मॅच जिखप भारताक खूब म्हत्वाचें आशिल्लें, अशें सगळ्यांचें मत. कारण संवसारीक विक्रमवीर आनी फुडाराक जाचे कडल्यान जायत्यो अपेक्षा आसात, त्या विराट कोहली वा हिटमन रोहित शर्माक लागून भारताक हो मुकुट मेळचो, अशें भारतीयांक दिसतालें. पूण…. भारतीय पंगड दुबळो जावचो ना वा भारतीय खेळगड्याचो आनी पंगडाचो मोग उणो जावचो ना हाचेर खाशेली नदर दवरप खूब गरजेचें. क्रिकेट आसूं वा हेर खंयचोय खेळ. एक पंगड जिखता आनी दुसरो पंगड हारता. पूण हारपी पंगडाचेर टिका करचे परस खेळगड्यांनी दुसरे मॅचींत नवे उमेदीन आनी उर्जेन मॅच जिखपाची तांक तयार करची आनी ते खातीर खेळां मोगींनी अशा पंगडाक आदार दिवचो, हें तितलेंच म्हत्वाचें.
निमाणे मॅची खातीर नरेंद्र मोदी स्टेडियमाचेर जाल्ली ती आतां मेरेनची सगळ्यांत व्हडली गर्दी. प्रधानमंत्र्यां सयत जायते राजकी फुडारी आशिल्ले. भारतान हो विश्वचषक जिखपाची इत्सा आशिल्ल्यान पंगडाचें मनोबल वाडोवपा खातीर सगळेच सहकार्य दिताले. पूण ऑस्ट्रेलियन पंगड भारता परस श्रेश्ठ आसा हें दिसून आयलें. तांणी बरी फिल्डिंग करून भारतीय पंगडा कडल्यान सुमार 30 धांवड्यो वाचयल्यो. हाचो भार भारताक सोंसचो पडलो, हें न्हयकारूंक जायना. विश्वचषक सोंपतकच मतां उक्तावपाचे पद्दतींतल्यान उबी जाल्ली आनीक एक म्हत्वाची गजाल म्हळ्यार फाटल्या धा मॅचींनी भारताचो पयलो बाॅलर सिराजान बरो खेळ केल्लो. सुरवातीच्या काळांत ताका बाॅलिंगे पसून पयस कित्याक दवरलो? कारण अजून स्पश्ट जावंक ना. सिराजान बाॅलिंगेचो भार हाताळ्ळो जाल्यार कांय बदल करप शक्य आसतलें.
ऑस्ट्रेलियेचे बॅट्समन जे तरेन बॅटिंग करताले ताका लागून ऑस्ट्रेलियेचो पंगड जिखलो हें न्हयकारूंक जायना. बरेच फावटी जीवदान मेळयिल्ल्या बॅट्समनांनी आपल्या पंगडा खातीर येसस्वी झेज दिलें. आतां संवसारीक सर्त सोंपली. ताची कविता गावंन अर्थ ना. भारतीय पंगडान जायते फावट भारतीयांक सुखद धक्को दिला. दिवाळी फुलोवपाची संद दिल्या. एक मॅची वरवीं भारतीय पंगडाचो दर्जो जोखप योग्य थारचें ना. फुडाराक भारतीय पंगडाक यश मेळटलें हें निश्चीत. पूण योग्य वेवस्थापनाचे नदरेन गंभीरतायेन लक्ष दिवप तितलेंच म्हत्वाचें. भारतीय पंगडाचें खेळाचें एकंदर वेवस्थापन आतां मेरेन बरें आसा. पूण म्हत्वाच्या मॅचींत आमी उणे पडचे नात, हाचे कडेन खाशेलें लक्ष दिवप तितलेंच म्हत्वाचें.
उदय सावंत
7972079443
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
